Listen Now: 
Tiaki i a Tangaroa
Kei te takahi te Minita i ngā take Ahumahi, a Nathan Guy i ngā whakaritenga o te ture rawa ika o te tau iwa tekau mā rua, i tāna whakatau kia whakawhāitihia te maha o ngā pāua e taea ai e tātou te tango ake i te moana. Koirā tā te tāhūhū rangapū o Te Ohu Kaimoana, tā Dion Tuuta. Hei tāna, e tautoko ana rātou i te tiakitanga me te tāwharautanga o te tini a Tangaroa kia kore ai e pau, ēngari, ko tēnei kaupapa, he muru kē na te Karauna i ngā tika o te Māori ki ngā rawa o te moana.
Kaupapa te reo Māori a te roopu Kākāriki
E ai ki te kaiarahi i te roopu Kākāriki, a James Shaw, kua tae ki te wā e ako ai ngā tamariki katoa o tēnei whenua i te reo Māori. Hei tā Shaw, hāunga anō ā rātou kaupapa here mo te tāke, te tuakokatanga tamariki me te taiao, kei te tino poho kererū ia ki tā rātou kaupapa here mo te reo, a, ki te uru ngā Kākāriki ki te Kāwanatanga i te taha o Reipa, ka whakatinanatia taua kaupapa.
Kaupapa whānau pōhara a te roopu Reipa
E kī taurangi ana a Jacinda Ardern, ina Kāwanatanga rātou ka whakatika rātou i ngā raru e whakauaua ana i te noho a ngā whānau pōhara. I toro ia i te whare o Ratonga Penapena Pūtea o Māngere, arā, o te Māngere Budgeting Service i ngā rā tata nei. Hei tā te tāhūhū rangapū o taua whare, a Darryl Evans, kei te tautoko te Kāwanatanga i a rātou ki te manaaki i te toru rau whānau, ēngari, toru mano whānau kua tae ki a rātou i tēnei tau hei āwhina mā rātou.
Piki ngā tatauranga a te roopu Kākāriki
E ai ki ngā tatauranga Colmar Brunton hou o te wā, kei te piki hāere te ora ki Ngā Kākāriki. Kua piki rātou ki te waru oorau o te tautoko, heoi, kua heke te tautoko ki a Reipa, ma te whitu oorau, arā, ki te toru tekau ma whitu oorau. Na tēnei hekenga, kua piki a Nahinara ki te whā tekau mā ono oorau o te tautoko. Kei te rima oorau a Aotearoa Tuatahi, nō reira, e kore a Shane Jones e uru ki te whare pāremata ina pēra tonu rātou, ā, kotahi oorau o te tautoko e hāere ana ki te RTM.
Te tono tiriti a nga iwi o Hauraki
Hei tā te māngai torangapū mō te rohe o Te Waiariki a Te Ururoa Flavell, i mahi nui ia ki te kimi rangaawatea e tau ai te puehu i wāenganui i a Ngai te Rangi me Hauraki, auare ake. Nō te wiki nei ka whakatārewahia e te Minita i ngā take Tiriti, e Christopher Finlayson te waitohutanga o te whakaaetanga e tau ai te tono tiriti a ngā iwi o Hauraki, na te whakahē a ngā iwi o Tauranga moana.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
