Listen Now: 
Te rohe pooti o Tāmaki Makaurau
Kua whakarewahia e te māngai o te RTM ki te rohe pooti o Tāmaki, arā, e Shane Taurima te maha o ngā kaupapa here hei whakatika i ngā raru i roto i te whaitua nui o te motu. Hei tā Taurima, ki te whai waahi te RTM ki te Kāwanatanga hou, ka whakatinana rātou i ēnei kaupapa here nei. Kua taka ēnei kaupapa here ki raro i tā rātou rautaki e kiia nei ko Manaaki Tangata – No One Left Behind. He kaupapa e whai ana kia turakina te kāinga koretanga, te iti o te utu ki ētahi mō ā rātou mahi, te tuākokatanga, te kore mahi me te tūkino whānau. Ko ētahi atu kaupapa here i roto i te rautaki ko te whakarauora i te reo me te whakawhanake i ngā pākihi Māori. E ai ki te rangahau Reid Research o kō tata ake nei, e toru tekau mā rua oorau e tautoko ana i Shane Taurima, kei muri noa atu ia i a Peeni Henare o Reipa, kei a ia te whā tekau mā ono oorau o te tautoko. Kei te rua tekau mā tahi oorau o te tautoko a Mārama Davison o Ngā Kākāriki.
Te rarangi pooti Māori
Kei te tautoko te māngai o Hauraki Waikato a Nanaia Mahuta, i ngā amuamu a ngā kaipooti Māori mo te komihana pooti me te kuare o ētahi o ngā kaiwhakahaere wāhi pooti ki ngā kōrero mo te rarangi pooti Māori. Ko te pouako torangapū o te Kunenga ki Purehuroa a Veronica Tawhai tētahi kua tuku amuamu ōkawa. Hei tā Mahuta, e tika ana kia āta arotakehia tēnei āhuatanga, i te mea, ko tēnei kuaretanga tētahi o ngā take e ngoikore nei te Māori ki te pooti.
Lance O'Sullivan mo te Paati Māori
E tumanako ana a Lance O'Sullivan, tākuta ki roto o Kaitaia, ma tāna whakapuaki kōrero mo tana tū ma te RTM hei te tau rua mano rua tekau, ka piki te tautoko ki te roopu i tēnei kōwhiringa pooti e tu nei i tēnei tau. Hei tāna, he hononga kei waenganui i ngā take hauora me te ao torangapū, koia ia e hihiri nei ki te tū hei māngai mo te RTM a te tau rua mano rua tekau.
Whakamahi i te reo ia rā
Ko te hua o te wiki o te reo Māori, ko te whakahihiri i te whakaaro kia āta rautaki me pēhea to whakamahi i te reo ia rā, ia rā. Koira tā Ruakere Hond, pou toko reo o Taranaki. Hei tāna, e koa ana hoki tōna ngākau i te kaha o te hunga pāpāho ki te whakamahi i te reo i te roanga o te wiki.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
