Listen Now: 
Te Whakakotahitanga o te Ao
Kei te karapinepine atu ngā ihumanea o te ao Māori me ngā Māori kua tae-ā-tinana atu ki Te Whakakotahitanga o te Ao, ki Te Whanganui-ā-Tara āpōpō ki te wānanga, mēnā rā kua puta he hua i te tekau tau o te kawenata whakapūmau i ngā mōtika iwi taketake i whakamanatia ai e te Whakotahitanga o te Ao. Ko te Kōmihana Tika Tāngata me te Whare Wānanga o Te Kunenga ki Pūrehuroa kei te manaaki i te hui āpōpō.
Maina i te papa moana i waho o Taranaki
Mēnā ka tae mai a Trans Tasman Resources ki konei ki te maina i te papa moana i waho o Taranaki, ka heke te uara o ngā rawa ika ā te iwi Māori. Koirā tā te tāhūhū rangapū o Te Ohu Kaimoana tā Dion Tuuta. Kua whakaae te Mana Rauhi Taiao kia mainahia e Trans Tasman Resources te rima tekau miriona tana onepū rino i te papa moana i te tonga o Taranaki. Hei tā Tuuta, kei te whakahē Te Ohu Kaimoana i taua whakaaetanga.
Piki anō te tautoko ki ngā Kākāriki
Kei te piki anō te tautoko ki Ngā Kākāriki, whai muri iho i te rarunga o te roopu i ngā wiki tata nei. Hei tā Mārama Davidson o Ngā Kākāriki, mā te tautoko a te iwi Māori ka piki anō te ora ki Ngā Kākāriki. E ai ki ngā tatauranga torangapū o ngā rā nei, i heke te tautoko ki ngā Kākāriki ki te rima ōrau, engari, hei tā te rangahau newshub Reid hou, 6.1 ōrau te tautoko ki ngā Kākāriki i tēnei wā.
Rēhita ki te pooti!
Me aki ngā whānau i a rātou anō ki te pooti. Koira te karanga a te mangai mō Hauraki Waikato a Nanaia Mahuta. E toru wiki noa iho e toe ana ki te kōwhiringa pooti, ā, ahakoa kua hipa te wā mō te whai mōkihi pooti, ka tāea tonutia te rēhita me te pooti, tae noa atu ki te rā pooti hei te rua tekau mā toru o Mahuru. Hei tā Mahuta, wha rau mano tāngata tonu o tēnei whenua, kāore anō kia rēhita ki te pooti.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
