Whakapau $20 miriona ki nga ratonga P

Whakapau $20 miriona ki nga ratonga P

E kī taurangi ana a Nahinara, ka kaha ake tā rātou pakanga ki te taimiri P. He kaupapa tēnei e whakarewahia nei e rātou mei kore e tahuri ano te hunga pooti ki a rātou. Hei tā te peremia tuarua a Paula Bennett, ka tuku mana rātou ki nga pirihimana kia urutomo i ngā whare o ngā keenge me ngā kaihoko P, tae atu ki te ketuketu hāere ki roto i ngā waka o tēra hunga. Tuia ki tena, ka whakapau a Nahinara i te rua tekau miriona taara ki ngā ratonga P.

Te whakamahanatanga o te ao

Kei te hui ngā kairangahau me ngā whānau o te kaupapa Deep South Science Challenge ki roto i te Whanganui-a-Tara i te rā nei, ki te wānanga e ahu pēhea ana te mahi a te iwi Māori hei patu i te whakamahanatanga o te ao. Hei tā te kaiputaiao o NIWA, a Darren Ngaru King, ko tetahi o ngā whainga o te kaupapa nei, kia kite ai ka pēhea nei te pā o ngā āhuatanga o te whakamahanatanga o te ao ki ngā hāpori Māori, pēnei i te pikinga o te ūpoko o te tai, te rerekētanga o ngā whiu a te huarere, me te ngahorohorotanga o te papa whenua ki te moana.

Heke te utu rongoa, tākuta

E manako ana te Tarahiti o Waipareira, ma te whakaaetanga kei waenganui i a rātou ko Pharmac, ka heke hāere te utu mo te hoko rongoā me te hāere ki te tākuta i te uru o Tāmaki. Hei tā te tāhūhū rangapu o Waipareira, a John Tamihere, e kōkiri ana rātou i te wawata kia māmā ake te utu mo ngā take hauora o te rohe. Heoi, no te ono karaka i te ata nei i rere ai ngā karakia i te papa whenua i te rohe o Waterview, e whakatūria ai e te Tarahiti o Waipareira ētahi whare utu māmā maha mo ngā whānau Māori.

Tatauranga utu

Kua puta nga tatauranga hou mo te nui o te utu e hāere ana ki tēna, ki tēna o tātou. Ko nga wāhine Māori tonu kei te whakawhiwhia ki te utu pakupaku rawa o te katoa, arā, ko te utu taurite ki a rātou, ko te whitu rau, ono tekau mā whitu tāra i te wiki. Ko te utu taurite ki ngā wāhine katoa, ko te waru rau, toru tekau taara i te wiki, iwa ira kati wha oorau te iti ake o tēra utu taurite, i te utu taurite ki ngā tāne.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Waiheke protest clear-out "overreaction" New chair for Te Pumautanga o Te Arawa Portable pool could save lives