Listen Now: 
Kua whakakore tetahi hootaka hou
E whakahee ana te hapori Tonga o Aotearoa nei i te whakatau a Whakaata Maori kia poroa te hotaka 'Jonah from Tonga.' Hei taa Will Illo-lahia, mangai mo te hapori Tonga o tenei whenua, i whakahaere rangahau ia i waenganui i nga uri o Tonga, a, kaore tetahi kotahi i amuamu mo te kaupapa o taua hotaka, kaore hoki i kii, he kaikiri. Anei ra a Piripi Walker o te Poari o Whakaata Maori me nga korero mo te take i whakakorengia ai e ratou te hotaka 'Jonah from Tonga.'
He aha te anga whakamua mo ngaa whanau kore mahi?
Kei te raru nga whanau o Te Tai Tokerau i te kati haeretanga o nga mira rakau o te takiwaa. Koira taa te mangai mo Aotearoa Tuatahi ki Whangarei, taa Shane Jones. Hei taana, ka whakaritea e Aotearoa Tuatahi he putea hei awhina i nga rohe, ina pootihia ratou.
He kaupapa hou ka tuu apoopoo
Kei te whakaritea he raa e whakamaanawa ai a Te Aitanga a Hauiti ki Uawa i Te Tairaawhiti, i to raatou tipuna, i a Tuupaaea me tana taenga ki Uawa ma runga i te kaipuke o Kaapene Kuki. Nei ra a Victor Walker uri no Te Aitanga a Hauiti.
He kaupapa hou ki Rotorua
Kei te akiaki a Rotorua i nga kainoho o te rohe kia kirihou kore ratou mo te katoa o tenei marama. Hei taa Stavros Michael o te Kaunihera-a-rohe o Rotorua, e whakatenatena ana ratou i nga kainoho kia kaua e whakaae ki nga peeke kirihou i nga hokomaha, otira, kia ata whai whakaaro hoki, me pehea taa ratou hangarua i nga paatara me nga parapara o o ratou whare, kia ora ai te taiao.
Ngati Te Whiti he toopu whenua
I karangahia nga pirihimana ki te whakatau raruraru i waenganui i nga hapuu o Taranaki i nga rangi whakataa nei. Na nga whakapae mo te raweke putea i te Tarahiti Toopu Whenua o Ngati Te Whiti, ka tae atu etahi o nga uri o taua hapuu ki nga tari o taua Tarahiti, ki te pana i nga mangai o te Tarahiti ki waho. Hei taa tetahi o nga mangai o te Tarahiti, a Peter Moeahu, ko te putake o nga raruraru nei, ko tetahi uri kotahi o te hapu e tarahae ana, e ika haehae kupenga ana.
He waahi hou a te raa o Waitangi 2018
E whakaae ana te nuinga o Ngapuhi kia haere te powhiri ookawa i te ra o Waitangi, i te marae o Te Tii ki te Papa o te Tiriti. Koira taa Reuben Heihei, kaumatua o Ngapuhi.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
