June 25, 2017
E whakahee ana etahi uri o te motu i te keri maina
E whakahee ana etahi uri o te motu i te keri maina
E morearea ana te whakaaro kia mainahia te papa moana i waho i a Patea. Koira te whakatau a te roopu Kiwis Against Seabed Mining. Ko ratou ko Ngati Ruanui, ko te rangai hii ika i takatuu ake ki mua i te aroaro o te Mana Tiaki Taiao i nga ra tata nei ki te whakahee i te hiahia o Trans Tasman Resources kia mainahia te rima tekau miriona tana onepu i te papa moana i Paatea i roto i te toru tekau ma rima tau e tu nei. Hei taa Cindy Baxter, mangai mo te roopu Kiwis Against Seabed Mining, ki te mainahia taua papa moana, ka parekuratia nga koiora moana katoa o reira.
Native American hui ki Aotearoa
Kua whai te whare wananga o Waikato i te mana whakahaere i te hui e kiia nei ko te Native American and Indigenous Studies Association conference, hei te tau rua mano tekau ma iwa. Hei taa Lisa Gardiner o Taapoi Aotearoa, i whai te whare wananga nei i te mana whakahaere i tenei hui, na ona hononga pumau ki te ahurea maori o te takiwa, otira, ki nga iwi o Waikato Tainui. Neke atu i te waru rau tauira no te ao whaanui ka tae-a-tinana ki te hui nei.
He hootaka whakamomori hou
Kua puta i te roopu Te Rau Matatini nga whitiahua e wha hei awhina i nga rangatahi ki te kaupare atu i nga whakaaro whakamomori. Hei taa Maria Baker o Te Rau Matatini, na te hunga rangatahi tonu ratou i awhina ki te waihanga i enei whitiahua nei, ko te ngako, me pehea te kimi awhina, me tahuri ki a wai, kia maarewa ake koe i te korokoro o te parata.
Ngaa tauira Campaign for Change
Ko te nuinga o nga tauira i haere mai ki konei ki te awhina i a Reipa i raro i te kaupapa Campaign for Change, kei te ngahau, kei te harikoa, kei te ako. Koira taa te mangai torangapu mo Tamaki, taa Peeni Henare. Kua puta nga korero mo nga amuamu e pa ana ki to ratou waahi noho i te marae o Awataha, engari, hei taa Henare, kua korero ia ki nga tauira, a, kaore ratou i te amuamu.
He raa nui e whakanui ana i a Taa Maui Pomare
I whakamaharatia te ra o Taa Maui Pomare i te marae o Owae i Taranaki i nga rangi whakataa nei. Ko Ruakere Hond te mangai mo tenei kaupapa.
He huihuinga motuhake hou ki Ngamotu
Kua whakarewahia he kaupapa mahi tahi hou ki waenganui i te Kaunihera o Ngamotu me te iwi mana whenua o te takiwaa, ko te huinga taumatua te ingoa. Ko Liana Poutu te mangai korero mo tenei take.
Copyright © 2017, UMA Broadcasting Ltd: www.waateanews.com