June 13, 2017
He puutea aawhina mo ngaa whanau o Patu Taatahi
He puutea aawhina mo ngaa whanau o Patu Taatahi
Tekau mano taara kua kohaina e nga Maori kei Poihakena e noho ana, ki nga whanau i raru nui i te waipuketanga o te rohe o Patu Taatahi i tera marama. I whakahaere ngahau ratou i te wiki nei ki te kohi i taua putea, ko Caii-Michelle Baker tetahi o nga kaiwaiata rongonui o Ahitereiria i tae atu. No nga ra tata nei i tau atu ai te haki mo te tekau mano taara ki nga ringaringa o te Tumuaki o te Kura o Ruatoki, ara, o Hans Tiakiwai.
He aha te rongoa mo Ngaapuhi?
Hei taa Tuhoronuku, e hiahia ana ratou ki te noho tahi me nga rangatira o Te Kotahitanga ki te wananga i te ahunga whakamua o te tono raupatu a Ngapuhi. Hei taa te toihau o Tuhoronuku a Hone Sadler, me whakahaere tenei wananga i raro i nga tikanga a Ngapuhi. E tautoko ana a Tuhoronuku i te whakatau a te peremia a Bill English kia mutu taa te Kawanatanga awhina i a Ngapuhi, kia oti ra ano te kowhiringa pooti o tenei tau. Heoi, hei taa Te Kotahitanga, i pera ai te whakatau a te Peremia kia kaua ai a Tuhoronuku e turakina, i raro i nga tutohinga o te purongo Maranga Mai.
Whare Pukapuka o Pooneke
He rawe te kite atu i nga kawenata tapu o tenei whenua e whakaaturia ana ki te katoa i roto i te whare pukapuka o te motu i Te Whanganui-a-Tara. Koira taa Hami Piripi o Te Tai Tokerau.
Te hootaka Matariki ki Tamaki Makaurau
He ra manu aute, he karakia huakirangi, he ahurei kai, he whakataetae kapa haka, he puroku kokorangi, he whakakitenga toi, he ngahau oro waiata….koira etahi o nga kaupapa kua whakaritea e te Kaunihera o Tamaki hei whakanui i te maatahi o te tau, i a Matariki. E harikoa ana te kahika o Tamaki a Phil Goff ki te kaha o tana Kaunihera ki te hapai i te kaupapa o Matariki, ka mutu, hei taana, he kaupapa e renarena ai te whanaungatanga i waenganui i te Kaunihera me nga iwi mana whenua o Tamaki
Whakakore i ngaa inu kino
E karanga ana a Hapai Te Hauora me te Uepu Niho o te motu ki te Minita i nga Take Matauranga ki a Nikki Kaye kia tautoko i taa ratou kaupapa, kia wai maori anake nga kura o te motu. Hei taa te tahuhu rangapu o Hapai a Lance Norman, kua roa ratou e ngana ana kia tangohia, kia rahuitia nga inu mirumiru, kii ana i te huka i nga kura.
Ngaa rauemi whakaako hiitori o Aotearoa
Kua whakatahangia e Te Minita Whakawhanake Maaori e Te Ururoa Flavell raua ko te Minita i nga take Matauranga a Nikki Kaye tetahi putea kia pai ai taa nga kura whakaako i te hiitori o tenei whenua ki waa tatou tamariki. Nei raa to tatou Minita Whakawhanake Maaori.
Copyright © 2017, UMA Broadcasting Ltd: www.waateanews.com