Listen Now: 
Whakatau i te kokoraho o Te Whakatohea
Hei taa tetahi o nga hapu o Te Whakatohea, kaore tonu ratou i te whakaae kia whakatauhia te kokoraho a Te Whakatohea. Hei taa Tracey Hillier, mangai mo te hapu o Ngai Tamahaua, kaore ano ratou kia whai waahi ki te whakatakoto korero ki mua i te aroaro o te Roopu Whakamana i te Tiriti. Rua tekau tau kua hipa i te huri tuaraa o Te Whakatohea ki te whakataunga, wha tekau miriona taara te uara. Ko Taa Douglas Graham te minita i nga take tiriti, i taua wa.
Pehea ngaa kaimahi o te roopu maori?
Kei te whawhai a Ngati Whakaue ki te whakatau a te Ratonga Hauora o Nga Roto kia whakakorengia te kaupapa Hunga Manaaki i roto i te hohipera o Rotorua. Hei taa Wiremu Keepa, mangai mo Ngati Whakaue, he mea whakatuu te kaupapa Hunga Manaaki e te iwi, e rua tekau tau ki muri nei, a, ko te hiahia o te iwi, kia haere tonu te kaupapa.
He hui nui ka tuu ki Tauranga Moana
Me hui nga iwi o Tauranga Moana ki te wananga mena ra he paanga too te tono takutai moana a nga iwi o Hauraki ki a ratou. Koira taa Hauata Palmer, kaumaatua o Tauranga Moana
Me anga pehea ngaa whanau o Te Raki Paewhenua?
Tera pea ka haere te pakanga mo te marae o Awataha i Te Raki Pae Whenua ki te kooti. Hei taa Hohepa McLean, mangai mo Te Komiti Maori o Te Raki Pae Whenua, kua hoha ratou i te wairua whakatuanui o nga kaiwhakahaere i te marae e aukati nei i te marae ki te hapori kia kore ai e whakamahia e ratou.
Ko Rongowhakaata ngaa mangai hou
Kua timu te tai ki a Ngati Toa Rangatira i Te Papa Tongarewa, kei a Rongowhakaata te paepae inaianei, a, ka pari mai aana taonga whakahirahira hei whakamiharotanga ma te marea hei te rua tekau ma iwa o Mahuru, haere ake mo te rua tau. No te ra inanahi i whakamahara ai i te kotahi rau, rima tekau tau o te ngaromanga o te whare o Te Hau ki Turanga i te rohe o Rongowhakaata. Hei taa te Kaihautuu Maori o Te Papa a Arapata Hakiwai, ko te tumanako, he wa whakamahu mamae kei te haere, i nga tau e rua e tuu mai nei.
Kei te anga pehea a Ngapuhi?
Kia tae ki nga haatepe whakamutunga o te whakatau tono raupatu, katahi ka uaua haere. Koira taa te peremia, taa Bill English, whai muri iho i te whakatau a te Kawanatanga kia mutu taa ratou awhina i a Ngapuhi mo tenei wa, kia oti ra ano i a Ngapuhi te taraiti me te taranui o tona whare tapu te whakakotahi. Hei taa English ano, e tautoko ana ia i te whakahau a Ngapuhi kia neke nga tikanga ookawa o te ra o Waitangi i te marae o te Tii ki te papa o te Tiriti, me te aha, kei te waahi kotahi oo raua ko Kingi Taurua, kaumatua o Ngapuhi, whakaaro.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
