June 11, 2017
He hui nui ki te marae o Awataha
He hui nui ki te marae o Awataha
Kei te whakahaere porotuu te Komiti Maori o Te Raki Pae Whenua ki waho i te marae o Awataha i te ra nei. Hei taa te Komiti, kua uu atu nga uri o te whanau o Arnold Manaaki Wilson ki te whakahaere i te marae, me te aha, kaore ratou i te whakawaatea i te marae ki nga kaupapa a te hapori Maori o Te Raki Pae Whenua. Nei ra a Hohepa McClean o te Komiti Maori o Te Raki Pae Whenua.
Kua whakarewaina te tau hou maori ki Tamaki Makaurau
No nga rangi whakataa nei i whakarewahia ai e te Kaunihera o Tamaki aana kaupapa hei whakanui i te maatahi o te tau, ara, i a Matariki. I tuu he raa manu aute ki Takaparawhaa inanahi, ko Ngati Whatua o Orakei i te manaaki i taua kaupapa. Mo te katoa o tenei marama ka whakahaerehia etahi kaupapa whakahirahira hei whakatairanga i te rerenga mai o te kahui whetuu o Matariki. Nei ra a Rereata Makiha, pou tikanga Maori o te Kaunihera o Tamaki.
Te Puhi, he whakaaturanga auraki hou
Hei te po nei ka whakapuarehia te whakaari Te Puhi ki te marea. Ko Taupunakohe Tocker tetahi o nga kiri puaki.
Ehara tenei i te wa tika o Matariki
Moata rawa taa tatou whakanui i a Matariki. Koira taa Ahorangi Rangi Matamua o te Whare Wananga o Waikato. Hei taana, e ngana ana tatou ki te whakatairite i te maramataka Maori ki te maramataka Pakeha kia tuu ai a Matariki i te wa kotahi, ia te tau, engari, i tenei wa, kaore ano te maramataka Maori kia eke ki te marama o Pipiri, no reira, kotahi marama tonu e toe ana ki te maatahi o te tau Maori.
Kia whakakotahi kia whai hua te katoa
Kei te koomitimitihia Te Kura Kaupapa Maori o Manurewa me Te Wharekura o Manurewa kia tuu ai raua hei kura kotahi. Rua tekau ma wha miriona taara ka whakapaua kia tutuki ai tenei koomitimititanga. Ko Mahia Nathan te tumuaki o TKKM o Manurewa.
Kua ea te whakapaahaa
E hia rau taangata i tae atu ki Parihaka i tera Paraire ki te whakarongo ki te whakapaaha a te Karauna mo te tukinotanga o nga tuupuna o Parihaka i te pahuatanga o te tau kotahi mano, waru rau, waru tekau ma tahi. Hei taaa Ruakere Hond, mangai mo Parihaka, tekau tau ratou e whakapau kaha ana kia tae ki te ra o te Paraire, i kiia ai, ko te Puanga Haeata.
Copyright © 2017, UMA Broadcasting Ltd: www.waateanews.com