Ngaa hootaka mate whakamomori mo te iwi maori

Ngaa hootaka mate whakamomori mo te iwi maori

Hei taa te roopu mate hinengaro e kiia nei ko Maternal Care Action Group, he rautaki ngutu kau noa iho te rautaki a te Manatu Hauora e pa ana ki te mate whakamomori. Hei taa Kristina Paterson, mangai mo te roopu nei, e toru noa iho nga hui i whakahaerehia ai ki te iwi Maori mo tenei rautaki, ara, ki Kerikeri, Kirikiriroa me Whakatane. Hei taa Moe Milne, tautohito hauora, kino ke atu nga tatauranga mate whakamomori mo te iwi Maori, no reira, me kaha ke atu taa te Manatu Hauora whakapaa mai ki a tatou.

Ko te ao maori hei kai maa te katoa

Kaua te iwi Maori e whakamaa ki te whakamahi i te ahurea Maori hei mahi moni ma ratou. Koira te whakatau a te toihau o Te Puia, a Karl Johnstone. Kei te korero a Johnstone ki tetahi hui i Tamaki i te ra nei, ko Nui te Korero te ingoa. Hei taana, e tika ana kia manawa kai tutae te iwi Maori, otira, kia auaha hoki nga whakaaro, kia ahu whakamua ai te ahurea Maori hei oranga tinana mo tatou.

Nga mahi tuupeka, nga hikareti

Hei taa te roopu Hapai Te Hauora, kei te utu nga umanga tupeka nui pera i a British American Tobacco me Imperial Tobacco i etahi kaimahi toa ki te whakatairanga i aa ratou whakahee e pa ana ki te taake hou tera pea ka utaina atu ki runga i te tupeka. Hei taa Zoe Hawke o Hapai, kei te utu hoki aua umanga i etahi Maori rongonui ki te kimi Maori hei whakamatautau i waa ratou hikareti hou, ahakoa te mohio o aua Maori rongonui ra ki te kino ka paa i te momi hikareti.

He take nui taa Te Ikaroa

E ngana ana te roopu porotuu e kiia nei ko Te Ikaroa, ki te kawe petihana ki te Hui a Te Whakakotahitanga o te Ao ka tu ki New York i tenei wiki, hei taahora atu ma ratou ki mua i te aroaro o nga mangai no Norway. Ko te ngako o taua petihana, kia hoki atu a Statoil me Chevron, he umanga hinu no Norway, i te Tai Rawhiti ki to ratou kainga. Hei taa Tina Ngata o te roopu Ikaroa, e waru tekau nga hapuu o te Tai Rawhiti e tautoko ana i te petihana.

Ngaa whakapono o te haahi Ihirama

Kua tahuri a Winston Peters ki te whakatupato i nga whanau Ihirama o tenei whenua, whai muri iho i nga mahi whakatuatea i Ranana i nga wiki nei. Hei taana, no nga maatua ihirama te hee e haere nei aa ratou tamariki ihirama ki te koohuru taangata hara kore, no reira, me whakatika ratou i o ratou whare. Nei ra nga urupare a Te Rata Hikairo, ihirama Maori.

Tere rawa te haere o Pem Bird

E pouri ana a Pem Bird, tautohito matauranga, i whakawhiwhia nei ki tetahi tohu i te rarangi tohu a te Kuini i tenei wiki, i mau ia i nga pirihimana, kotahi rau, whitu tekau kiromita te tere i roto i tana waka. Kia tahuri ake tatou.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Orakei hearing to share Maori abuse survivor stories New rules for whitebait protection Battle memorial opened by Rangiriri road