Akuanei ka heke a Shane Jones mai i tana tuuranga

A teera wiki, ka heke a Jones mai i tana tuuranga

Kei te rere nga mihi i te Minita i nga Take Aorere, i a Murray McCully ki a Shane Jones, i te pai o taana mahi hei Mangai mo Aotearoa ki nga Take o te Moananui-a-Kiwa i nga tau e toru nei. Hei te mutunga o tenei marama ka heke iho a Jones i taua turanga mahi, a, i tuu he hakari ki te Whare Wananga o Tamaki inapo kia pai ai te mihi ki a ia.

He aha te hua mo te Tai Tokerau?

E kore pea Te Tai Tokerau e paku whai hua i te tahua putea a te Minita i nga Take Putea a Steven Joyce. Koira te heitara a te mangai torangapu o Te Tai Tokerau, a Kelvin Davis. Hei tenei Ra pare ka panui mai a Joyce i nga whakaritenga o te tahua putea mo tenei tau, engari, kua puta ke mai etahi o nga tohanga putea, pera i te rua tekau ma whitu miriona taara mo nga take whare Maori me nga take whakahou marae. Hei taa Davis, ahakoa era momo putea, e kore pea e uu atu ki tona rohe pooti o Te Tai Tokerau hei oranga nui mo ratou.

Kia piki te puutea aawhina o ngaa hootaka Whanau Ora

Ko te tumanako ia kia haere tonu he putea i te Tahua Putea o tenei tau ki te kaupapa Whanau Ora. Hei taa Henare Kiingi, kaiwetewete take toorangapuu, e tika ana kia tautokohia tonuhia a Whanau Ora ki te putea.

Para Kore ki Pooneke

kua tae atu nga mangai o te kaupapa Para Kore ki Te Whanganui-a-Tara ki te whakatenatena i nga marae o te rohe ki te hono ki te kaupapa. Hei taa Te Kawa Robb o te kaupapa Para Kore, ko te awa o Owhiro tetahi tauira o te kino ka paa ki to tatou taiao i te korenga o tatou e aronui ki te hangarua i nga parapara pera i te kirihou. I tenei wa, kotahi rau, whitu tekau ma rima nga marae, Kohanga, KKM hoki, puta noa i te motu, kua whakaae kia Para kore ratou.

Te Kawa o Te Urewera

Kua tuuwhera te wa e tapae whakaaro ai nga uri o Ngai Tuuhoe ki te rautaki "Te Kawa o Te Urewera" – he rautaki whakahaere i te ngahere o Te Urewera. Hei taa te Upoko o te Poari o Te Urewera a Tamati Kruger, he rautaki hou tenei e tauawhi ana i nga rawa o te ngahere me te whenua. Nei ra a Tunuiarangi Maclean o Ngai Tuuhoe.

Me titiro anoo ki ngaa tikanga kooti

E tika ana kia panonitia nga tikanga kooti. Hei taa Takuta Rose Pere o Waikaremoana, ma tatou ano waa tatou taiohi kei raro i te tekau ma whitu nga tau e whakawaa, kaua ma te kooti.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Tohu marks Ngati Whatua gift to Auckland Busting out poi for app launch He aituaa.