Me aronui taatou ki te purongo hou nei

Me aronui ki ngaa whare whakaruruhau tamariki

Hei taa te kaikomihana tamariki a Andrew Beecroft i roto i tana purongo hou, me kaha ake te aro nui o nga whare whakaahuru taiohi o te Manatu Oranga Tamariki, ki nga kaupapa Maori. E tino tautokohia ana tenei whakahau aana, e Annette Sykes, roia Maori.

Ko wai a Alfred Ngaro ki te koorero peera?

Kua whakapaaha te Minita Tuarua i nga Take Whare a Alfred Ngaro o Nahinara, moona i kii ake, ka tapahia e ia te putea e haere ana ki nga Ratonga Awhina Taangata pera i a MUMA, mena ra ka wero a Willie Jackson o Reipa i a Nahinara i nga wiki e ahu atu ana ki te kowhiringa pooti o te motu. Hei taa te mangai torangapu o Te Taitokerau a Kelvin Davis, kua whakaatu mai a Ngaro i ona taera tuuturu, ara, tuuturi iho ki mua i a Nahinara, ki te kore, ka porowhiua koe ki te rua para.

He aha te huarahi whakamua mo Ngati Kahu?

Me kaua te Minita i nga Take Tiriti, a Chris Finlayson e tohutohu i a Ngaati Kahu. Koira te huatau o Haami Piripi, toihau o Te Runanga o Te Rarawa. No tera wiki i tango ai te Minita i te mana o te Runanga ki te whiriwhiri i te tono raupatu a Ngati Kahu.

Haere, haere haere atu ra e te rangatira

Hei te ata nei ka nehua tetahi o nga pou o te whakataunga tiriti a Ngai Tahu, ara, a Trevor Howse. I runga ia i te Runanga o Ngai Tahu, a, he maha aana rangahau kia tutuki ai te tono raupatu a Ngai Tahu. Kei Tuahiwi Marae tona tangihanga, hei te tekau ma tahi karaka ka timata.

Kia uu ngaa kaipuke nui i taua takiwa

E hiahia ana nga kaiwhakahaere i te waapu o Ohinehou, ara, o Lyttleton ki te whakawhaanui i te whanga moana kia uu mai ai nga kaipuke nui ki reira, engari, kaore a Ngai Tahu i te whakaae. Hei taa Manaia Cunningham o Ngai Tahu, ka raru nga rauwiringa kaiao o te whanga moana ra.

Kua whai hua a SeeCom

No Kirikiriroa te hunga i toa i roto i te whakataetae DIGMYIDEA Maori Innovation Challenge. Ko Adele Sauer te kaiarahi i te kahui i whakawhiwhia ki te tohu Mauri Tu mo taa ratou taupaanga reo rotarota Maori, ara, Maori sign language app, ko SeeCom te ingoa. Huri rawa ake ki te whakataetae ma te hunga rangatahi, no Kirikiriroa hoki a Nicole Calderwood, koia i whakawhiwhia ki te tohu Mauri oho mo tana pae tukutuku hei awhina i nga tauira ki te tono karahipi.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Te Arawa saxophonist silenced as Minarapa Mitai-Ngātai mourned Lawyers challenge land law reform rush Rich trove for Maori researcher