May 14, 2017
Kei te anga pehea ki te rawhiti o Tamaki Makaurau?
Kei te anga pehea ki te rawhiti o Tamaki Makaurau?
Kua tahuri a Aotearoa Tuatahi ki te tautoko i a Reipa, me te whakahee i te hokotanga atu o tetahi papa reehia i Pt England i te ra whiti o Tamaki, tekau ma tahi heketea te rahi, ki a Ngati Paoa hei whakatuu ma te iwi i te toru rau whare ki runga. Nei raa a Pita Paraone, mangai mo Aoteroa Tuatahi.
Me whakapai ngaa whare tiaki tamariki
Hei taa te Komihana Tamariki a Andrew Becroft, ano nei he whare herehere ke te ahua o etahi o nga whare ahuru mo nga taiohi kua taka ki te hee. Kei te whakahaere te Manatu Oranga Tamariki i enei whare aahuru, engari, hei taa Becroft, e hee ana te wairua o roto i aua whare. Kua puta he purongo i a Becroft, e mea ana, he pai ke atu te tuku i nga taiohi kua taka ki te hee ki etahi whare hou ki roto i o ratou ake hapori, kia riro ma reira aua taiohi e whakaora, a-hinegaro-, a-wairua, a-tinana hoki.
He whare herehere kaupapa maori
I runga a Kelvin Davis o Reipa i a Marae inanahi e kii ana, ko tona hiahia kia tuu he whare herehere kaupapa Maori, ehara i te mea me tuu he whare herehere mo te Maori anake. E tautoko ana a Rihari Dargaville, apiha whare herehere oo mua.
He pakihi hanga miere hou
Kua hoatu e Te Puni Kokiri te kotahi rau, whitu tekau mano taara ki tetahi pakihi hanga miere i te Tai Ra Whiti. Tekau ma rua mano heketea whenua e taka ana ki raro i a Ngati Porou Miere, hei taa Di Grennell o TPK, ko tenei putea nei tetahi koha hei whakatutuki i nga whainga i roto i te purongo mo te whakapiki i te ohanga o Te Tai Ra Whiti.
Kua haere a Te Ururoa Flavell ki taawaahi
No nga ra tata nei i wehe atu ai te Minita Whakawhanake Maori ki Maaraia ki te koorero paakihi ki te Kaawanatanga o reira. E ai ki nga korero, ka tae atu ia ki ngaa urupaa ki te pohangahanga atu ki nga hoia Maori kei aua urupaa e okioki ana. Hei taa Heemana Waaka, o te roopuu Te Paerae-roa a Tu, e ohorere ana ia, kaore te Minita i whakapaa atu ki tona roopu.
Ko te wahine maori e kookiri whakamua ana
Kua whakanuia te angitu o nga Maori i te rangai pakihi me te rangai hangarau. Tokomaha nga waahine i whai tohu i te Po Tohu Pakihi Maori, ara, ko Mavis Mullins te kaipakihi Maori o te tau, Ko Paewai Mullins Shearing tetahi o aana pakihi, engari, kei runga hoki i te maha o nga poari, pera i a Landcorp, 2degrees Mobile me Poutama Trust. Ko Hinerangi Raumati te wahine pakihi o te tau, nana a Tainui Group Holdings me Te Wananga o Aotearoa i tootoo mai i te korokoro o te Parata, a, koia te toihau mohoa o Parininihi Ki Waitotara. Huri rawa atu ki te Po Tohu Pakihi Hangarau, i whakawhiwhia te tohu e kiia nei ko te Callaghan Innovation Hi-Tech Maori Innovation Award, ki a Biolytix, he pakihi e whakamahi hangarau ana ki te taatari para hamuti.
Copyright © 2017, UMA Broadcasting Ltd: www.waateanews.com