May 04, 2017
Te hootaka reo maori o Waikato-Tainui
Te hootaka reo maori o Waikato-Tainui
Kei te kokiri a Waikato Tainui i etahi whakaakoranga reo Maori hou ma te hunga e kaingakau ana ki te ako. Ko Te Reo Kakaho te whakaakoranga ma nga pia o te reo, ko Te Reo Kapuia te whakaakoranga ma nga kaiako, ko Te Reo Ara Tau te whakaakoranga ma nga rangatahi e puta mai ana i te kura tuarua. Hei taa Rahui Papa, upoko o Te Arataura, ko te whainga kia waru tekau oorau o te iwi e mohio ana ki te korero i te reo. I tenei wa, e toru tekau oorau e mohio ana.
E kookiri whakamua ana te pire maori hou
No te po nei i puta ai te ihu o te pire take Maori, ara, o Maori Purposes Bill i te whare paaremata. Ko te matuu o taua pire kia whai ture whakahaere hou te Tarahiti o Wi Pere i Turanga. Hei taa te Minita Whakawhanake Maori a Te Ururoa Flavell, kei te Tarahiti te mana ki te whakahaere i aana kaupapa inaianei. Ono tekau ma ono miriona taara te uara o nga rawa a te Tarahiti o Wi Pere.
Ko wai ka whai hua i Te Tai Tokerau?
Ka uaua. Koira te whakatau a Winston Peters mo te aranga ake ano o Hone Harawira ki te whakataetae i te turu torangapu o Te Tai Tokerau. Hei taa Peters, he atamai a Harawira, atamai ake i taa te marea e whakaaro nei, engari, ka uaua te kaahaki i te turu i nga ringa kaha o Kelvin Davis o Reipa.
Ko te tarukino he raruraru nui
Hei taa te tangata i whakatuu i te Opportunities Party a Gareth Morgan, ko te taru rauhea te take nui e hiahia ana te hunga rangatahi kia ata korerotia. Hei taa Morgan, me panoni i nga ture taru rauhea o tenei whenua. Heoi, kei te whakahee te kaiarahi takirua i te RTM, a Te Ururoa Flavell. Hei taana, mena e hiahia ana a Morgan kia pooti te hunga rangatahi ki tana paati, me whakatuu kaupapa whai take, hei aha te taaweewee taru rauhea ki mua i o ratou ihu.
Ko wai te wahine kirikau ki te mahi peera?
E rere tonu ana nga whakaaro o te ao Maori ki te wahine kirikau i runga i te kootihi o Taranaki. Hei taa Wharehoka Wano, i tenei wa nei kei te whiriwhiri ratou i te whakataunga tiriti mo te maunga, a, e pouri ana etahi o te iwi i te mahi a Jaylene Cook, te wahine e korerohia nei. Hei taa Tawhirimatea Williams kaumatua o Te Whakatohea, mahunga wai ana, whakaaro kore ana te mahi a taua wahine.
Maa ngaa marae e whakatau, e whakarite
Mena he kaumatua raweke tamariki, tukino wahine ranei kei runga i te marae e tuu puu korero ana, a kaati, ma taua marae tonu taua take e whakatau. Koira taa Haami Piripi o Te Runanga o Te Rarawa, whai muri iho i te purongo mo tenei take i puta ake i te hotaka o Marae i te ra tapu nei.
Copyright © 2017, UMA Broadcasting Ltd: www.waateanews.com