April 26, 2017
He puutea aawhina hou mo te rangahau mate hinengaro
He puutea aawhina hou mo tetahi rangahau mate hinengaro
Ko te manako kia puta he hua i te kaupapa rangahau mate hinengaro hou. Ko te manako kia puta he hua i te kaupapa rangahau mate hinengaro rua miriona taara te uara, ki nga rangatahi Maori me nga hapori Maori. Koira taa te Tahuhu Rangapu o te Kaunihera Hauora o te Motu, taa Kath McPherson. Hei taana, ehara i te mea, kotahi te rongoaa mo nga mate hinengaro katoa, a, he rereke nga ahuatanga o te mate hinengaro Maori, i te mate hinengaro e paa atu ana ki era atu iwi o te ao. Nei ra a Taakuta Te Kani Kingi, matanga mate hinengaro Maori.
Ko ngaa Karu Rima ara Five Eyes
Me puta a Aotearoa i te kahui e kiia nei, ko Karu Rima, ara, Five Eyes. Koira te hiahia o te kaiarahi i Nga Kakariki, ara, o Metiria Turei. Kua tae atu nga upoko o nga ratonga tuutei o Amerika, Piritana Nui, Kaanata, Ahitereiria me Aotearoa ki Otakou ki te korero i nga take tutei i raro i te maru o te kahui Karu Rima. Hei taa Turei, kaore he pirihongatanga, kaore he ponotanga i roto i te roopu Karu Rima.
He tari hou ki taawaahi
Rima tekau maa toru miriona taara kei te whakapaua e te Kawanatanga ki te whakatuu whare Kawanatanga hou ki Dubai. Kaore a Adrian Rurawhe o te roopuu Reipa i te whakaae.
Tokomaha ngaa maori i whai hua
Ko Tangiwai Ria, tohunga kapa haka no te roopu Waihiirere raua ko Rueben Collier, tautohito papaho no Ngati Rereahu, Ngati Maniapoto, etahi i whakawhiwhia ki te tohu huaanga i te whare o te Kawana Tianara inanahi.
He rangatahi Ahuwhenua Maori
Tokotoru nga kaiahuwhenua rangatahi Maori, e rua tekau ma tahi o ratou tau, ka whakamatautauria i roto i te marama e tu mai nei, kia kite ai ko wai o ratou ka whakawhiwhia ki te tohu Ahuwhenua Young Maori Farmer mo tenei tau. Kei Tawanui Station i Raetihi a Dylan Ruki-Fowlie o Te Atihaunui a Papa-rangi e mahi ana, Kei Pihanui Station i Te Wairoa a Jordan Biddle o Ngati Pahauwera, a, ko te pamu e mahi ana a Hemoata Kopa o Ngapuhi, ko Pukemiro Station, tata ana ki Tamaki-nui-a-rua.
Kia mahitahi te iwi me te Kaunihera
Kei te whakatuu roopu hou te Kaunihera o Turanga kia pai ai te mahi tahi a te iwi me te Kaunihera. Ko te kahika a Meng Foon, ko te tokorima kaikaunihera tae atu ki nga mangai tokorua no Rongowhakaata, Tamanuhiri me Te Aitanga-a-Mahaki ka noho ki te roopu hou nei. Hei taa Foon, ko te whainga kia tiaki te roopu nei i nga rawa o te rohe, me te aronui ki te mana o te Maori ki te wai, ki te whenua me nga wahi tapu.
Copyright © 2017, UMA Broadcasting Ltd: www.waateanews.com