Listen Now: 
He aha te rongoa patu rewharewha?
Kua rewa te kaupapa e whai ai tatou i te rongoaa patu rewharewha mo te takurua e kainamu mai nei. Kei te tino whakatenatenahia tatou o te ao Maori ki te whai i taua rongoaa, ka puuwerohia mai ki o tatou tinana. Hei taa Taakuta Matire Harwood, e kaha ana te kitea o nga momo mate puukahukahu i roto i a tatou o te ao Maori, pera i te mate huangoo, no reira, ma whai i te rongoaa rewharewha mei kore e araihia atu taua mate hei tenei takurua.
Kei te anga whakamua te rangai rawa ika maori
Kei te tino ora te rangai rawa ika Maori. Koira taa Shane Jones, Toihau o mua o Te Ohu Kaimoana, whai muri iho i te hui taumata i tuu ki Tamaki i tera wiki. Hei taa Jones, e harikoa ana ana kei te renarena haere ano te taukaea o te whanaungatanga i waenganui i te Ohu Kaimoana me nga pakihi hao ika Maori, whai muri iho i te hia tau e piitawitawi ana.
Nga Hikareti-I he hua o eera?
He mea pai te whakatau a te Kawanatanga kia uru mai te i-hikareti ki tenei whenua hei hoko ma te hunga e hiahia ana ki te whakarere i te tupeka. Koira taa Zoe Hawke o te roopu Hapai Te Hauora. E rite ana nga whakaaro o Mason Ngawhika o te roopu Toi Taangata, ki oo Hawke.
He manu kiwi i te tonga o Tamaki Makaurau
Kua powhiritia e nga iwi e whai paanga ana ki nga pae maunga Hunua, nga kiwi e ono ki to ratou ngahere. E toru nga uwha, e toru nga tourawhi me te wawata ia kia puta he uri i a ratou. Hei taa Tipa Compain o Ngati Paoa, kei te whakatipu hoki i te taupori kokako i roto i te ngahere o Hunua.
Green Party List
Kua puta i te Roopu Kakariki taa ratou rarangi ingoa mo te kowhiringa pooti e tu mai nei i tenei tau. Kua piki a Marama Davidson ki te turanga tuawha me Jack McDonald ki te turanga tuaiwa.
Kua mate a Pa Henare Tate
Kei te tangihia tetahi o nga pou o te haahi katorika, a Pa Henare Arekatera Tate. I mate ia i Rawene i te ra horoi, no Ngati Te Mara, Ngati Tamatea, Ngati Manawa me Te Rarawa ia. Nei raa a Pihopa Kito Piikaahu. Kei Motutii marae a Pa Henare Tate e takoto ana. Hei te tekau karaka o te ata o te Wenerei ka nehua.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
