March 30, 2017
Kei mua i te aroaro o Paaremata te pire whakahou i te ture whenua maori.
Kei mua i te aroaro o Paaremata te pire whakahou i te ture whenua maori
Kua horahia te pire whakahou i Te Ture Whenua Maori ki te whare paaremata. Tokomaha nga taangata e whakahee ana i te pire, mai i nga roia ki nga tarahiti whenua tae atu ki nga kaiwhakawaa o te Kooti Whenua Maori. Heoi, hei taa te Minita Whakawhanake Maori a Te Ururoa Flavell, kua kawea tenei take ki te tii ki te taa, a, e whakapono ana ia, ma tenei whakahoutanga i te ture, ka uaua ke atu te tango whenua Maori i raro i te ture Public Works, otira, ka mama ake taa nga kaipupuri, whakawhanake i o ratou whenua.
He kaupapa nui mo Seeka
Kua puare i te Kiingi Maori te tari hou o Seeka i Te Puke. Ko Seeka te umanga nui rawa o te motu mo te whakatipu hua kiwi. Hei taa Kingi Tuheitia, mai ra ano te taamirotanga o te Kingitanga ki a Tauranga Moana, a, he maha nga tarahiti Maori e pupuri hea ana i roto i a Seeka. Hei taana ano, kei te awhina a Seeka i nga iwi Maori o te rohe ki te whakatipu i waa ratou ake pakihi.
Kei te whakakotahi a Tuhoronuku i a Ngapuhi
E ai ki te Toihau o Te Runanga o Ngapuhi a Sonny Tau, e tuu ana a Tuhoronuku ki te whakakotahi i a Ngapuhi, kia kore ai e whakaroherohea e te Kawanatanga. Hei taa Tau, e tautoko ana ratou i a Tuhoronuku hei kaikokiri i te tono raupatu a Ngapuhi. Hei taana ano, e pai ana pea ma nga hapuu aa ratou ake take tiriti e kokiri, engari, i te mutunga iho, ma te iwi nui tonu e whakaoti, e whakatinana.
He rangahau hou
Kei te whakahaere rangahau hou a Taakuta Michael Nailer o te whare wananga o Te Kunenga ki Purehuroa, e titiro hohonu ana ki nga mahi kua mahia i te ono tau, mai i te ru whenua nui i hauruturutu ra i a Otautahi. Hei taana, ko te wawata, ma tenei rangahau aana, ka mohio nga whenua o te ao me aha, ina paa te ru whenua nui ki a ratou. Hei taana, he maha nga hapa o te Kawanatanga o konei i enei tau e ono nei, a, e tautoko ana a Ateremu McNeil o Otautahi i taua korero.
He korero taa Cameron Slater e pa ana kia Willie Jackson
E ai ki te kaituhi kowae ipurangi a Cameron Slater, he moumou te hono tanga atu o Willie Jackson ki a Reipa. Hei taana, kei te totohu tonu a Reipa i roto i nga tatauranga torangapu o te wa. Hei enei rangi whakataa nei, ka hui a Reipa ki te whiriwhiri i taa ratou rarangi ingoa, a, ko te wawata o Jackson kia teitei taana noho ki taua rarangi. Hei taa Slater, ara, ko Whale Oil, pai ke atu mena ra i hono a Jackson ki te RTM.
Nga wahine momi hikareti i te waa e hapu ana
Kei te kaha tonu nga waahine Maori ki te momi tuupeka i te waa e hapu ana ratou.. Hei taa Rangi Mclean, Kaumaatua o te marae o Manurewa, e tahuri ana ratou ki te awhina i enei waahine nei, kia mutu taua ahuatanga
Copyright © 2017, UMA Broadcasting Ltd: www.waateanews.com