March 26, 2017
Ahuwhenua Finalists
Ahuwhenua Finalists
Kua kitea nga paamu mo te whiringa whakamutunga o te Ipu Ahuwhenua mo tenei tau, ara, ko te paamu a te Tarahiti o Omapere Rangihamama, tata ana ki Kaikohe. Ko te paamu e kiia nei ko Puketawa Station i Eketahuna…me te paamu a te Tarahiti o Pukepoto i Ongarue. Hei taa te Minita Whakawhanake Maori, a Te Ururoa Flavell, kei te aronui te katoa o enei paamu e toru ki nga kaupapa tiaki taiao, ka mutu, e aronui ana ano hoki ki nga tikanga Maori i roto i a ratou mahi whakahaere paamu. Hei te rua tekau ma ono o Haratua ka kopoua he toa whakaihuwaka.
Key Turei
Kaore e taea te kii, na John Key i pai ake ai te noho a te marea o tenei whenua. Koira taa te kaiarahi i Nga Kakariki, taa Metiria Turei. I tuku a Key i ana mihi whakamutunga ki te whare paaremata inapo. Hei taa Turei, ko te ohaaki a Key, ko te pikinga ake o te tokomaha o nga tamariki e tuakoka ana, ko te pikinga ake o te mate rumatiki me te pikinga ake o te maha o nga awa e paru ana. Hei taa Turei, i raro i nga whakahaere a Key, i whai rawa ake te hunga whai rawa, i pohara ake te hunga pohara.
Paremata
E ai ki nga korero, i tuu te whakatuatea ki waho i te whare paaremata o Ingarangi i te ata nei. I werohia tetahi pirihimana ki te oka, i rangona te pu e pakoo ana, Tokorua nga taangata i mate i te tukinga o raua e te waka. E ai ki nga korero e ahu mai ana i Ingarangi, kua puhia te kaiwhakatuatea kia mate. Kua haria te peremia o Ingarangi, a Theresa May, ki tetahi waahi haumaru.
Tourism Tairawhiti
ma te mahi tahi ka kaha ake te whai hua o nga taapoi Maori i roto i Te Tai Rawhiti. Koira taa te tumu whakahaere o Tapoi Tairawhiti, taa Mere Pohatu. Hei taana i te hui a Te Puni Kokiri mo te Rangai Tapoi Maori inanahi, koinei te wa e ata tirohia ai e tatou, me pehea taa tatou whakawhanake i nga taapoi Maori kia angitu ake ai. Hei taana, he maha nga tapoi Maori kei te whakahaere kaupapa whakangau kararehe, hii ika, hangi me te kapa haka i roto i te Tai Rawhiti, engari, ehara i te mea, e whai putea nui ana ratou.
Whakatohea claim
Kei te ngana ano a Whakatohea ki te whakatau i taana tono raupatu, engari, i te ahua nei, kua raru ano. E ai ki te hunga e kokiri ana i te tono, kei a ratou te iwa tekau oorau o te tautoko a te iwi, engari, hei taa Russell Hollis o Te Whakatohea, kei te hee tena. E rua tekau tau ki muri nei, ka pooti whakahee a Te Whakatohea, i te whakataunga wha tekau miriona taara te nui.
NZ Petroleum Conference
Neke atu i te rima mano kiromita o to tatou whenua taurikura me te wha rau, whitu tekau mano o to tatou moana aioo kei te tukuna e te Kawanatanga ki nga umanga o tawahi hei rangahau ma ratou mo te kapuni, te hinu me te koohuke. He mea panui tenei e te Minita i nga take Pungao, e Judith Collins i te NZ Petroleum Conference inanahi. Ko Hinekaa Mako tetahi o te hunga e porotuu ana ki waho i taua hui.
Copyright © 2017, UMA Broadcasting Ltd: www.waateanews.com