March 20, 2017
He rongoaa mo te whanga o Kawhia
He rongoaa mo te whanga o Kawhia
He mea nui kia kitea he rongoaa mo te whanga o Kawhia. Koira taa te mangai torangapu mo Hauraki Waikato, taa Nanaia Mahuta. I haere a Mahuta ki Waipapa Marae i Kawhia ki te korero ki nga uri o Ngati Hikairo me Ngati Maniapoto mo te whakawhanaketanga o te rohe o Kawhia, a, ko te oranga o te whanga tetahi mea nui e tutuki ai nga wawata taumata rau o te hapori.
Hotaka Te Whare Hukahuka
Na wai i whaanui, katahi ka whaanui ke atu te hotaka a Te Whare Hukahuka e whakangungu ana i a tatou rangatahi kia noho ai ratou ki nga poari ikeike o te motu a tona wa. Katahi ano nga kaiwhakahaere i Te Whare Hukahuka, a Shay Wright raua ko Travis O’Keefe ka whai i te kotahi rau, rima tekau mano taara i te Manatu Take Rangatahi, kia tokomaha ake ai rangatahi Maori ki ta raua hotaka.
Te utu mo nga rongoaa
Teitei rawa te utu mo nga rongoaa. Koira te heitara a te mangai torangapu o Te Taitokerau a Kelvin Davis. Hei taana, na te teitei o te utu ki te tiki i nga rongoaa, kaore nga turoro Maori i te whai i nga rongoaa e tika ana mo ratou. Hei taa Davis, kua tahuri etahi o nga whare rongoaa o Te Tai Tokerau ki te whakamama ake i te utu mo nga rongoaa kia piki ai te ora o nga Maori o te hapori.
Nga whenua o Te Uri o Hau
Kua timata Te Uri o Hau ki te whiriwhiri, me pehea tana whakarite i nga whenua kua hoki nei ki te iwi i raro i taa ratou whakataunga tiriti. Hei taa te toihau, a Russell Kemp, kua whai ratou i nga whenua ngahere, i Pakiri ki Mangawhai, engari, ahakoa te kii a te Karauna ka taupaa kore taa ratou whakawhanake i taua whenua, kua hua ake he taupaa.
Copyright © 2017, UMA Broadcasting Ltd: www.waateanews.com