February 20, 2017
Rautaki whakatuu whare a Ngati Paoa
Rautaki whakatuu whare a Ngati Paoa
Me kimi ara ano e parematahia ai te tono raupatu a Ngati Paoa, kaua e tuku i nga papa rehia tumatanui ki a ratou. Koira te ia o nga korero a te Kahika o Tamaki, a Phil Goff. I korero a Goff ki te Komiti Taiao o te Whare Paremata inapo, kei te whakarongo te Komiti ki nga tapae korero ki te rautaki whakatuu whare a Ngati Paoa ki te Wai o Mokoia, ara, ki Point England. Hei taa Goff, he mea nui kia waiho nga papa rehia o te hapori o te Wai o Mokoia.
Hui pakihi Taniwha Tarakona
I tino angitu te ra tuatahi o te hui pakihi Taniwha Tarakona. He hui tenei i karangahia ai e Ngahiwi Tomoana, tahuhu rangapu o Ngati Kahungunu, kia tae mai nga mangai pakihi no Ahia ki te noho tahi ki nga mangai pakihi no te Ao Maori i nga ra e rua i mua i te timatanga o Te Matatini. Ko te whainga kia oti etahi whakaaetanga tauhokohoko kotahi rau miriona taara te uara, i roto i nga ra e rua o te hui Taniwha Taraakona, a, inanahi, e rima tekau miriona taara te uara o nga whakaaetanga tauhokohoko i tutuki.
Kelvin Davis whakatau
Heoi, hei taa Kelvin Davis o Reipa, ina pooti koe ki te roopu Mana i te Tai Tokerau, kei te pooti koe ki a Nahinara. Hei taa Davis, ki te hiahia te rohe o Te Tai Tokerau ki te panoni i te Kawanatanga, pootihia a Reipa.
150 tau o Hato Hohepa
E ahu whakamua ana nga whakaritenga mo te huritau kotahi rau, rima tekau tau o te kura koohine o Hato Hohepa i Heretaunga. Neke atu i te tekau mano koohine Maori kua kuraina ki taua kura i roto i nga tau, a, i tenei tau, kua riro te katoa o nga turanga, ara, neke atu i te rua rau tauira kei reira. Hei taa Stephanie Tibble, tetahi o nga kaiwhakarite i te huritau kotahi rau, rima tekau, tata ki te waru rau tauira o mua o te kura, kua reehita mo te huritau ka tuu hei te tuaono ki te tuawaru o Whiringa-a-nuku.
Metiria Turei whakatau
Heoi, hei taa Meteria Turei o Nga Kakariki, ma te moe tahi a Mana me te RTM, ka pakari ake te tuu a Nahinara. Hei taa Andrew Little, kaiarahi i a Reipa, e whakapono ana ia ka mau tonu i a Kelvin Davis te tuuru o Te Tai Tokerau, ahakoa te whakaritenga nei kia kaua te RTM e whakatu tangata ki taua rohe, kia watea ai a Hone Harawira ki te pakanga ki a Davis.
Copyright © 2017, UMA Broadcasting Ltd: www.waateanews.com