February 06, 2017
Mana Maori
Mana Maori
Kua tata oti. Koira taa te perehitini o te RTM, taa Tukoroirangi Morgan raua ko te kaiarahi i te roopu Mana a Hone Harawira mo tetahi waikanaetanga mahi tahi ki te kowhiringa pooti hei tenei tau. Kua ahua roa nga roopu e rua e wananga ana, e whiriwhiri ana me pehea, heoi, i nga ra e rua nei, i noho tahi a Morgan me Harawira, rae ki te rae, ki te whakatutuki i te kaupapa. Hei taa Morgan, i hapa nga roopu e rua i te korenga o raua i mahi tahi i te kowhiringa pooti whakamutunga, mea rawa ake, ka riro te nuinga o nga turu Maori i a Reipa. Hei taa Morgan, ka puta he whakatau, i mua i te whakataetae Te Matatini hei te mutunga o tenei marama.
Hui whakanui i te ra o Waitangi
Me maatua mohio te katoa o nga taangata o tenei whenua ki nga korero mo to tatou onamata, mo to tatou hiitori, mo to tatou Tiriti. Koira te matuu o te kauhau a te Kawana Tinara, a Kahurangi Patsy Reddy i tana hui inanahi hei whakanui i te ra o Waitangi. He roia a Reddy i mua i tana kopoutanga hei Kawana Tianara, a, koia tetahi o nga kaiwhiriwhiri i te tono raupatu a nga iwi o Tauranga moana. Hei taana, na tana rangahau i nga korero mo taua tono, ka maatau ia ki nga peehitanga kua tau ki runga i te iwi Maori.
Nga whakahaere mo Waitangi a tera tau
Kua whakatuu komiti te Tarahiti o Waitangi kia rangahau ai mena ma ratou ke te powhiri ki Waitangi e whakahaere a tera tau. Hei taa te heamana o te Tarahiti a Pita Paraone, tokomaha nga uri o Ngapuhi e hoha marika ana ki nga whakahaere ki runga i te marae o Te Tii.
He aitua
I toromi tetahi wahine, i ona tau rua tekau, i roto i te awa o Waikato inanahi. I whakatuwherahia nga kuaha o te paapuni wai, mea rawa ake, ka tooia ia e te ia wai ki tona mate. I reira nga whakatupato kia kaua e kaukau ki tera wahanga o te awa.
Copyright © 2017, UMA Broadcasting Ltd: www.waateanews.com