February 01, 2017
Pooti o te motu 23 o Mahuru
Pooti o te motu 23 o Mahuru
Kaore e kore ka tahuri nga roopu torangapu ki te rangahau, e ahu mai ana aa ratou pooti i tehea whakatipuranga, i ehea rohe o te motu, whai muri iho i te whakatau a te peremia kia tuu te ra pooti o te motu hei te rua tekau ma toru o Mahuru. E haere ana te kaiarahi i a Reipa a Andrew Little raua ko te mangai o Te Tai Tonga a Rino Tirikatene ki Poihakena hei te ra horoi ki te tautoko i nga kaupapa whakanui i te Tiriti o Waitangi ki reira. Heoi, hei taa te kaiarahi i te RTM, a Te Ururoa Flavell, ahakoa kei Poihakena, otira, Ahitereiria te tokomaha o nga Maori e noho ana, ehara i te mea, maa aa ratou pooti ka toa a Reipa. Hei taa Flavell, kaore i te RTM te putea ki te haere ki Ahitereiria ki te korero ki nga Maori o reira, kanohi ki te kanohi.
Ako nga tamariki i te reo Maori
Kua tahuri etahi o nga ratonga matauranga ki te tautoko i te kaupapa a te Roopu Kakariki, kia ako nga tamariki katoa o nga kura katoa o Aotearoa i te reo Maori. Hei taa te Perehitini o Te Riu Roa a Lynda Stuart, ma te maahorahora i te reo Maori ki roto i nga kura, ka kore te reo e noho tauhou ki te marea o tenei whenua, a, ka haaneanea ake te noho a nga tamariki Maori ki te kura. Heoi, hei taana, ko te taupaa ke, me pehea te whakaminamina i nga taangata matatau ki te korero Maori ki nga kura hei kaiako.
Ruu whenua i Kaikoura
I ruu ano te whenua i roto i te rohe o Kaikoura inapo. E ai ki nga korero, i rongo te whaanuitanga o te hapori i te whenua e ngaaueue ana i raro iho i o ratou waewae, e rima ira kati tahi te kaha, i te rua tekau meneti i te tekau ma tahi karaka inapo.
Te whakahau a Winston Peters mo Trump
Kopia te waha. Koira te whakahau a te kaiarahi i te roopu Aotearoa Tuatahi, a Winston Peters ki nga kaitorangapu o tenei whenua, e whakaputa whakaaro nei ki te whakatau a Donald Trump kia katia nga kuaha o Amerika ki nga koorana. Hei taa Peters ki nga kaitorangapu o tenei whenua, kia tupato ki o korero, kei takahi motumotu i nga herenga ohanga i waenganui i a tatou ko Amerika.
Te hikoi P
Kua timata tetahi hikoi i Te Rerenga Wairua hei whakatairanga i te kino o te taimiri P i roto i nga hapori me nga whanau o te Tai Tokerau. Hei taa te kaiwhakahaere i te hikoi, a Reti Boynton, ko te whainga kia tae atu te tira hikoi ki Waitangi hei te ata o te ra tapu, kia kitea, kia rangona ratou, otira, taa ratou karere kia patua te ngarara P, e nga kaitorangapu.
Arotakehia te mahi a te roopu Callaghan Innovation
Kua ata arotakehia te mahi a te roopu Callaghan Innovation, a, kua kitea, ko te wahanga o taua ratonga kawanatanga e tino angitu ana, ko tona wahanga Maori. Na Kahurangi Paula Rebstock te arotake i hautuu, a, hei taana, he maha nga pakihi Maori auaha kua eke ki te taumata i roto i taa ratou mahi tahi ki a Callaghan, a, he mea pai tena. Heoi hei taana, ina titiro whaanui ki era atu waahanga o Callaghan, kei reira nga mooioiotanga.
Copyright © 2017, UMA Broadcasting Ltd: www.waateanews.com