Listen Now: 
He Uncle Tom a Winston Peters
Kei te whakamau te kaiarahi i te roopu Aotearoa Tuatahi a Winston Peters ki te tangata whai rawa ra ki a Gareth Morgan, moona i kii ake i runga i te pa o Ratana i tenei wiki, he Uncle Tom a Peters. Kua whakatere a Morgan i tona ake roopu torangapu, ko te Opportunities Party te ingoa, a, hei taana ki nga morehu o Ratana, me whakarere ratou i a Peters, na te mea, kua roa ia e taanoanoa ana, e whakatoihara ana i te Tiriti o Waitangi.
Tamaki Herenga Waka 2017
Ko te whainga kia kounga ake te Ahurei Tamaki Herenga Waka tuarua, i te Ahurei Tamaki Herenga Waka tuatahi, kia eke ai te Ahurei nei ki te taumata o nga Ahurei Kounga nui puta noa i te ao. Koira taa Vivien Bridgewater no te roopu ATEED. Ka tu te ahurei nei hei enei rangi whakataa, a, kua hunukuhia i Te Kapua ki te Whare Tapere ki te Wahapu o Tamaki i tenei tau, kia pai ake ai nga whakahaere.
Phil Goff ki Hoani Waititi Marae mo Waitangi
Kei te haere te kahika hou o Tamaki, a Phil Goff ki Hoani Waititi Marae ki te whakanui i te ra o Waitangi i tenei tau. Ko Black Slate, Katchafire, Kings me Moana & The Tribe etahi o nga roopu waiata ka whakangahau i te marea a taua ra, mo te kore utu.
Te Mate Arai Kore
Kia kitea te mate arai kore, me timata i taua wa tonu, te whangai rongoaa ki te turoro. Koira te hiahia o te tahuhu rangapu o te Tuapapa Mate Arai Kore o Aotearoa, ara, o Jason Myers, kia rite ai aa tatou tikanga mo te mate arai kore, ki nga tikanga i roto i era atu whenua o te ao. Hei taa Myers, he tawhito rawa a tatou tikanga, no reira, me whakahou ake. E ai ki nga tatauranga, he tokoiti nga Maori e raru ana i taua mate.
Kaihoe mo te ra o Waitangi
E whakarite ana nga matanga hoe waka o Te Tai Tokerau, ki te whakamanuhiri i te wha rau kaihoe no te motu whanui, ka tau atu ki roto o Waitangi mo te ra o Waitangi. Hei taa Robert Gabek, mangai mo nga roopu hoe waka o Te Tai Tokerau, kei te whakatuu papa kainga puroku ki nga hiirere o Haruru Falls hei waahi noho mo nga kaihoe nei.
Ka aha te whakapiki i te utu paeraro?
E ai ki te Roopu Tuakoka Tamariki o te Motu, ara, The Child Poverty Action Group, ahakoa te whakatau kia whakapikihia te utu paeraro, ma tena ka aha. Hei taa Ahorangi Susan St John, e kore nga whanau tuakoka e ora ake i te pikinga o te utu paeraro ki te $15.75.
Whakatuu paatu ki waenganui i Mehiko me Amerika
Kei te waitohu kawenata te perehitini o Amerika, a Donald Trump, e tuu ai te paatu i oatihia ra e ia i te wa o te kowhiringa pooti ka whakatuuria e ia, ki waenganui i te whenua o Mehiko me te whenua o Amerika. Hei taana, he hiahia toona kia mutu te rere tokitoki, te rere mana kore hoki o nga uri no Mehiko ki Amerika, noho ai, ngote ai i nga rawa e tika ana ma nga Amerikana.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
