January 22, 2017
Hapai nga kura i te rautaki Ka Hikitia
Hapai nga kura i te rautaki Ka Hikitia
E hiahia ana te kaikaute matua o te motu, a Lyn Provost kia hapai nga kura katoa o te motu i te rautaki Ka Hikitia, he rautaki i ata tuhia kia angitu ai nga tauira Maori i roto i te rangai matauranga. Hei taa Provost, mena ka ata titiro ki nga kura e tino kokiri ana i nga maataapono o te rautaki, kei te tino angitu nga tauira Maori o aua kura ra.
Te hingatanga o Tamaroa Nikora
E tangi ana a Ngai Tuhoe i te hingatanga o te toihau o mua o te Tarahiti o Tuhoe Waikaremoana, ara, o Tamaroa Nikora. I mate a Nikora inanahi 84 ona tau. Hei taa tona hoa, a Maanu Paul, ko Nikora tetahi o nga pou o te oranga mai ano o te Tuhoetanga i te ngahuru tau whitu tekau. Kei Tauarau Marae i Ruatoki a Nikora e tangihia ana.
Te hoko whenua paamu i te rohe o Ngamotu
Mena kei te hoko whenua paamu a wai ake ranei i te rohe o Ngamotu, me matua whai whakaaro ki te hitori o taua whenua. Koira te hiahia o te mangai mo te hapu o Nga Mahanga-a-Tairi a Dennis Ngawhare. Kei te hoko atu te whanau Jury i te kotahi rau, rima tekau heketea o taa ratou paamu. Kua kotahi rau, whitu tekau tau taua whanau e paamu ana i taua whenua. Hei taa Ngawhare, ko etahi wahanga o taua whenua, he waahi i maringi ai te toto o nga maatua tuupuna.
Te matenga a Percy Tipene
Kua hinga tetahi o nga totara o te iwi o Ngati Hine. I mate a Percy Tipene i te hohipera o Whangarei inanahi, ko te ikura roro te kaituraki i a ia. E ono tekau ma wha oona tau. Na Tipene te roopu Te Waka Kai Ora i whakatuu, tae atu ki te roopu Hua Parakore. Kei te marae o Motatau a Tipene e tukekahia ana e tona iwi.
Te whakahouhia o Te Kura Maori o Nga Tapuwae
Kei te whakahouhia ake te Te Kura Maori o Nga Tapuwae i te Tonga o Tamaki. Kua whai te whakahoutanga nei, i te ono miriona taara ano kia pai ai tana whakatuu akomanga hou ki runga i tona papa i Mangere. Hei taa te Minita i nga take Matauranga a Hekia Parata, na te taapiritanga o te ono miriona taara nei, ka eke te uara o te whakahoutanga ki te rua tekau ma tahi miriona taara.
Copyright © 2017, UMA Broadcasting Ltd: www.waateanews.com