Listen Now: 
Tutuki a Fletcher Residential
Kua tutuki te hoko a Fletcher Residential i te toru tekau ma toru heketea whenua i Otuataua i Ihumatao, Mangere. Kua roa te roopu SOUL e noho whakatauteute ana ki taua whenua ki te whakahee i te hiahia o Fletchers ki te whakatuu i te toru rau whare ki reira. Hei taa nga kaihautuu o Fletcher Residential, e mahi tahi ana ratou ko nga rangatira whai mana o Te Waiohua, ki te tiaki i nga waahi tapu Maori o runga i taua whenua.
Te katinga o Te Kura Kaupapa Maori o Rangiawhia
Uaua rawa te kimi rongoaa mo ana raru nui. Koira taa te Minita i nga Take Matauranga, taa Hekia Parata mo te katinga o te Kura Kaupapa Maori o Rangiawhia ki Whatuwhiwhi. No te marama o Hongongoi ka panaia e Parata te Poari o te kura, katahi ka whakatuuria he komihana ki reira ki te whakahaere i te kura. Hei taana, e pouri ana tona ngakau i te katinga o te kura, engari, kaore e taea te pehea.
Te turu torangapu o Rongotai
Mai ra ano te turu torangapu o Rongotai e toka ana ki a Reipa, heoi, kei te whakarere a Annette King i taua turu. E ai ki te Maori tuatahi kia tuu hei kahika tuarua o Te Whanganui-a-Tara, a Paul Eagle o Tainui, kei te aruaru ia i te whakaaetanga a Reipa kia tuu ia ma ratou ki taua tuuru hei te kowhiringa pooti a tera tau. Ina angitu ia, koia te Maori tuatahi kia whai tuuru auraki mo Reipa, i te kotahi rau tau.
Bill English ki te turanga peremia
Katahi ano a Bill English ka uu ki te turanga peremia o te motu, kei te karawhiua keetia ia e nga roopu apitihana. Tuatahi, ko tana whakakore atu i te turanga Minita Take Whare. Hei taa nga Apitihana, he tohu tenei kaore a English, a Nahinara ranei i te paku aro ki te kainga koretanga. Tuarua, kei te werohia ia mo te kore whakatuu tangata ki te kowhiringa pooti motuhake ka tuu ki te rohe o Owairaka, i te wehenga atu o David Shearer o Reipa.
Te whakatupato a Meka Whaitiri
E kokiri koohukihuki ana te Kawanatanga i nga panonitanga ki te Ture Whenua Maori i raro i etahi pohehetanga tino nui, me te aha, taihoa ake nei tatou ka kite i te hee o tera mahi. Koira te whakatupato a Meka Whaitiri o Reipa. I puta te pire mo te Ture Whenua Maori i tana panuitanga tuarua i te wiki nei, engari, hei taa Whaitiri, kaore tonu nga kaipupuri whenua Maori i te paku marama, he aha te hua o taua pire.
Kopoua te tumuaki o Te Kura-a-Rohe o Patea
Kua kopoua te tumuaki o te kura-a-rohe o Patea a Nicola Ngarewa ki te Kaunihera Matauranga o te motu. Hei taa te Minita i nga Take Matauranga, a Hekia Parata, ko taa te Kaunihera nei, he whiriwhiri i nga ara e kounga tonu ai te rangai matauranga o tenei whenua.
Nga kowaiwai a Godfried Lindauer
Neke atu i te wha mano taangata kua tomo ki te whare toi o Tamaki i nga wiki nei ki te matakitaki haere i te whakakitenga o nga kowaiwai a Godfried Lindauer. Hei taa nga kaiwhakahaere i te Whare Toi o Tamaki, he kotuku rerenga tahi a Lindauer, he kotuku rerenga tahi hoki aana mahi. Ko te wawata o nga kaiwhakahaere kia eke te rahi o te hunga kua toro i te whakakitenga nei, ki te kotahi rau mano. Hei te tekau ma iwa o Huitanguru ka mutu te whakakitenga nei.
Whakahaerehia he hotaka rangatahi ki Waipareira
Kei te whakahaerehia e te Whanau o Waipareira, he hotaka rangatahi i tenei wiki kia kore ai tera whakareanga e hoha, e toromi ranei i te hongehongeaa i tenei wa hararei. Kua mutu te kura, engari, kei te mahi tonu te tokomaha o nga maatua i tenei wiki, na whai ano te whakaaro o Waipareiria kia whakatuuria tenei hotaka kore utu i tenei wiki nei, me te whainga ra ia kia korikori nga tinana o nga rangatahi o te hotaka, ara, kia kaua ra ratou e whirinaki ki nga hangarau hei whakaihiihi i a ratou.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2016, UMA Broadcasting Ltd: www.waateanews.com
RELATED NEWS
