Te hekenga iho o John Key hei peremia

Te hekenga iho o John Key hei peremia

Me maia nga kaiarahi hou i te roopu o Nahinara i roto i nga uauatanga ohanga e kainamu mai ana. Koira te whakatupato a te kaiarahi i a Aotearoa Tuatahi, a Winston Peters. Hei te ra nei, ka okawa te hekenga iho o John Key i te turanga peremia, a, ka mana te noho a Bill English hei peremia hou, a Paula Bennett hei peremia tuarua hou. Ka riro te turanga o te Minita i nga Take Putea i a Steven Joyce. Hei taa Peters, he raru ohanga kei runga i tenei whenua e iri ana, koira te take i heke iho ai a John Key.

Nga whanau o te parekura o Pike River

Hei te ra nei ka tuu tauarai atu nga whanau o nga ika o te parekura o Pike River ki runga i te huarahi ki taua rua waru. Hei taa Bernie Monk, mangai mo nga whanau, kua whai mana ratou i te tangata, nona te whenua e tuu mai ra te huarahi, kia tuu whakataauteute ki runga i taua whenua ki te aukati i te haere a Solid Energy ki te rua waro. E hiahia ana a Solid Energy ki te purupuru i te kuaha ki taua rua mo ake tonu atu, engari, e hiahia ana nga whanau ki te tomo ki roto ki te kohikohi i nga koiwi o te rua tekau ma iwa i mate.

Kua piki te putea toopu a Moana New Zealand

Kua piki te putea toopu a te umanga hao ika Maori, ara, a Moana New Zealand i tenei tau putea. Rua tekau ma rua oorau te pikinga o te uara o te putea toopu i te tau putea nei, ara, ki te tekau ma iwa miriona taara. Hei taa Carl Carrington, tahuhu rangapu o Moana New Zealand, na te angitu o Sealord i angitu ai a Moana, ara, katoa katoa ona wahanga i whai hua, atu i tana pakihi hokohoko paua i raru nei i te pikinga o te pa mahanatanga o te wai i roto i te moana.

He mihi ki nga Roopu Hauora Maori

E mihi ana te Ratonga Hauora o Murihiku ki nga Roopu Hauora Maori o te rohe, mo ratou i awhina i te Ratonga Hauora o Murihiku ki te kokiri i te kaupapa mo nga wero arai mate ki nga whanau Maori. Hei taa Pania Coote o te Ratonga Hauora o Murihiku, iwa tekau ma wha oorau o nga tamariki Maori o te rohe i whai wero arai mate i te tau kua hipa, katahi te tatauranga ko tera.

Te pukowhai ki roto i te wai

E ai ki te mangai o Reipa mo Whanau Ora a Nanaia Mahuta, kaore e marama ana taa te RTM whakatau mo te pukowhai ki roto i te wai. Kua whakairi patai te RTM ki runga i te ipurangi, ko te ngako o taua patai, ae ranei ma nga Kaunihera-a-rohe, ma nga Ratonga Hauora ranei te pukowhai e whakauru, e tango ranei i te wai. Hei taa Mahuta, ko te raru o taua patai ra, ano nei e mea ana te RTM kaore i nga hapori te mana ki te whiriwhiri mena e hiahia ana ratou ki te pukowhai ki roto i o ratou wai.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Job initiative to tautoko rangatahi Marae programme up for youth awards Maori Party sells access to PM