December 08, 2016
Te wero a Whale Watch Kaikoura
Te wero a Whale Watch Kaikoura
Kei te wero a Whale Watch Kaikoura i te Kawanatanga kia kakama ake taa ratou tuku oranga ki te rohe o Kaikoura, whai muri iho i te paa o te ru whenua ki taua takiwa. Hei taa Whale Watch, kei te kokiri pire te Kawanatanga kia tae atu ai he oranga hou ki Kaikoura, engari, kei tetahi komiti whiriwhiri taua pire e maarari ana i tenei wa, me te aha, e whakamomori ana te rohe o Kaikoura kia oti etahi mahi koohukihuki, otira, kia tuu ano etahi ratonga whawhati tata hei oranga mo ratou.
Pukapuka hou New Treaty New Traditions
E rite ana nga whakataunga Tiriti ki tetahi tikanga whakawaimeha hou. Koira te heitara a Takuta Carwyn Jones i roto i tana pukapuka hou New Treaty New Traditions. He pouako a Jones i te Kura Ture o te Whare Wananga o Wikitoria, a, kua mahi ia ma te Roopu Whakamana i te Tiriti, te Tari Whakatau Tiriti me tona iwi i Te Wairoa i roto i nga tau. Hei taana, na nga whakataunga tiriti kua timata nga iwi ki te whai i nga tikanga Pakeha, pera i te whakatuu Poari me te whiriwhiri i o ratou uri hei mema.
He kaiurungi hou to Te Mangai Paaho
He kaiurungi hou to te waka o Te Mangai Paaho. I tuu taa ratou hui whakamutunga mo te tau inanahi, a, i reira, ka whakamaanawatia te kaiurungi o mua a Piri Sciascia, katahi ka powhiritia te kaiurungi hou a Eruera Prendergast Taarena. Kua roa a Tarena e mahi ana ma tona iwi, ma Ngai Tahu, a, he wawata oona kia tomo te rangai papaho Maori ki te ao matihiko.
Te wehenga a David Shearer i a Reipa
E ai ki nga korero, kei te whakarere a David Shearer i a Reipa kia haere ki Sudan ki te mahi ma te Whakakotahitanga o te Ao. Ma tana wehenga atu, ka tuu he kowhiringa pooti motuhake ki tona turu, ki a Owairaka Mt Albert. Hei taa Andrew Little, kaiarahi i a Reipa, e rite ana a Reipa mo tetahi kowhiringa pooti motuhake ki taua rohe, mena ka wehe atu a Shearer.
Whakapataritari a Ngati Hau ki Citibank
E haere tonu ana te whakapataritari a te iwi o Ngati Hau ki Citibank, kia mutu taa ratou tautoko i a Evolution Mining me taa ratou keri koura ki te putake o te maunga o Puhipuhi, tata ana ki Whangaarei. I haere etahi o nga kuia me nga kaumatua ki te whare o Citibank i te wiki nei, kia kite-a-kanohi ai nga kaimahi i te riri o te iwi. Hei taa te mangai mo te roopu MineWatch Northland a Tim Howard, ko Citibank te kaipupuri hea nui i roto i te umanga Evolution Mining.
Copyright © 2016, UMA Broadcasting Ltd: www.waateanews.com