Roopu Mana me Roopu Maori torangapu

Roopu Mana me Roopu Maori torangapu

E ngana ana au ki te hora i te kura ki te RTM. Koira taa te kaiarahi i te roopu Mana, taa Hone Harawira. No tera wiki i hui ai nga roopu e rua, a, ko te hua i puta, ko te whakatuunga mai o tetahi komiti hei whiriwhiri i te ara e mahi tahi ai nga roopu e rua ki te kowhiringa pooti o te motu a tera tau. Hei taa Harawira, mangai torangapu o mua o Te Taitokerau, mai ra ano i te timatanga o te roopu Mana, kua tuwhera te kuaha ki te RTM, engari auare ake, heoi, na te kopoutanga o Tukoroirangi Morgan hei perehitini o te RTM, kua noho nga roopu e rua ki te whare kotahi ki te korero.

Hui ma nga Taakuta Hauora ki Tamaki

Me whakatumatuma nga taakuta hauora no nga iwi taketake o te Moananui-a-Kiwa ki te kaikiritanga i roto i te rangai hauora. Koira taa te kaiwhakahaere i te hui ma nga Taakuta Hauora o te Moana nui-a-Kiwa e tu ana ki Tamaki i tenei wiki, taa taakuta Rawiri Jansen. Hei taana, ahakoa te tokomaha ake o nga taakuta hauora Maori o tenei whenua i enei ra, kaore ano te pakanga ki te kaikiritanga i roto i te rangai hauora kia mutu noa.

Te tono raupatu a Ngati Maru

E kainamu atu ana a Ngati Maru no te raki o Taranaki, ki te ra e tau ai taa ratou tono raupatu. I te whakamanuhiri ratou i nga mangai o te Kawanatanga me nga mangai o Te Papa Atawhai inanahi, kia kite ai ratou i nga waahi tapu o te iwi, tera pea ka whakahokia ki nga uri i raro i te whakataunga o te tono raupatu. Hei taa Anaru Marshall, mangai mo Ngati Maru, kua rua tekau ma whitu tau taa ratou tono e whiriwhirihia ana, a, ko te raupatutanga o to ratou whenua te puutake o te tono.

Aitua ki te Whare Wananga o Ohio

E ai ki nga korero e ahu mai ana i Amerika, i te whakapakoo puu tetahi tangata ki roto i te Whare Wananga o Ohio. I te rere te whakatupato ki nga tauira kia whakamaru ratou kei puhia. E ai ki nga korero, kotahi te ika kua mate i tenei wa, tokowhitu ano kua taotuu. E ai hoki ki nga korero, kua puhia te kaipupuhi kia mate.

He rahui ki Kaipara

Kua utaina atu e Ngati Whatua ki Kaipara he rahui ki runga i te kohi maataitai, hii ika hoki ki te whanga o te Kaipara, whai muri iho i te matenga o te tokowaru taangata i te takahuritanga o te waka Francie i nga rangi whakataa nei. Hei taa te toihau o Ngati Whatua a Hahi Walker, i tetahi wananga i Puatahi Marae te iwi i te wa i totohu ai taua waka i te ra horoi.

Whakatuu whare noho ki Te Atatu

Kua tohua e te Kawanatanga he whenua ki Te Atatu mo te whakatuu whare noho, a, e mea ana ratou, kei te roopu o Nga Mana Whenua o Tamaki Makaurau te kowhiringa tuatahi ki te whakatuu i aua whare, mena koina to ratou hiahia. Hei taa te Minita i nga take Whare a Nick Smith, ono tekau nga whare noho ka whakatuuria ki te huarahi o Titoki, e rua tekau oorau o aua whare noho, me taka ki raro iho i te ono rau, rima tekau mano taara te uara hoko.

Te tono a Maanu Paul ki te Kooti

Kei te tono te toihau o te Kaunihera Maori ki Maatatua a Maanu Paul kia riro ma tetahi kaiwhakawaa e whakatewhatewha te totara waahi ruatanga o te Kaunihera Maori i tenei wa. Hei taa Paul, koia tonu te toihau takirua o te Kaunihera Maori o te motu, ahakoa, kaore ia i tuku i tana ingoa hei pootitanga ma nga mema i taa ratou hui motuhake, i pootihia ai a taa Taihakurei Durie hei toihau, koia anake. E whai ana a Paul kia whakakorengia e te Kooti, te mana o taua hui, otira, o taua whakatau hoki e pa ana ki a Durie.

Whiwhi a Taakuta Amanda Black i te Marsden Fund

Kua whai putea a Taakuta Amanda Black o Te Whare Wananga o Waitaha i te Marsden Fund, hei awhina i a ia ki te rangahau, me pehea tatou e aukati ai i te urutomotanga mai o nga kiirearea me nga koiora kino ki konei ki te patu i to tatou taiao, penei i te mate kauri dieback. Ka ata tirotiro ia i nga tikanga Maori me nga tikanga Pakeha kia pakari ake ai ta tatou arai atu i nga kaipatu i to tatou taiao.

Follow us on &

Copyright © 2016, UMA Broadcasting Ltd: www.waateanews.com

RELATED NEWS

Quota limits raise Māori med school challenge TPP too risky for Maori Party Parata slates karanga protest