Putea a te Tahua Rangahau Marsden

Kua titarihia nga putea a te Tahua Rangahau Marsden ki nga kairangahau Maori. Ko Ahorangi Tahu Kukutai o Te Whare Wananga o Waikato kua whakawhiwhia ki te whitu rau, toru tekau ma rima mano taara mo tana rangahau toru tau e pa ana ki taa nga hapu o Waikato whakatuu i a ratou ano i muri mai i te whakawaimehatanga o ratou e te Pakeha. Rima rau, toru tekau mano taara kua tukuna ki a Taakuta Jennifer Cattermole o Te Whare Wananga o Otakou raua ko Maui Solomon o te Tarahiti Hokotehi Moriori kia rangahaua nga taonga puoru a te iwi Moriori, tae atu ki te toru rau mano taara kua hoatu nei ki a Taakuta Krushil Watene o Te Whare Wananga o Tamaki hei rangahau, me pehea e kaha ake ai te reo o te iwi Maori, otira, te reo o nga iwi taketake o te ao ki roto i nga kaupapa tika taangata puta noa i te ao.

Whare hou ki te uru o Tamaki

Kua waitohu whakaaetanga a Ngati Whatua o Kaipara, te Kawanatanga me te Hobsonville Land Company e tuu ai etahi whare hou ki te uru o Tamaki. Hei te raumati timata ai tenei mahi whakatuu whare.

Peeni Henare hui ki nga rangatira o Whakaata Maori

E hiahia ana te mangai torangapu o Tamaki Makaurau a Peeni Henare ki te hui ki nga rangatira o Whakaata Maori e pa ana ki taa ratou rautaki poro kaimahi. Tokomaha nga taangata e wero ana i tenei rautaki a Whakaata Maori. Kua powhiritia a Henare e nga rangatira o Whakaata Maori kia hui ki a ratou, a, hei taana, kia watea ia, ka whakaritea taua hui.

Metiria Turei i whiwhi ki te tohu a te Uepu Hauora Tumatanui

Kua whakawhiwhia a Metiria Turei, kaiarahi i Nga Kakariki, ki te tohu a te Uepu Hauora Tumatanui o te motu, ara, ki te tohu Tu Rangatira mo tana whakapau kaha ki nga take hauora Maori me te tuakokatanga tamariki. Ko Kahurangi Tariana Turia me Helen Herbert o te Tuapapa Rumatiki o te motu etahi kua whai i taua tohu i nga tau o mua.

Ture Whakahaere Rawa

Te ahua nei, ka whakatarewahia te whakahoutanga o te Ture Whakahaere Rawa. Hei taa te Minita i nga take Taiao, a Nick Smith, e hiahia ana ia ki te whakahoki i te pire whakahou i taua ture ki te Komiti Whiriwhiri ki te whakatikatika i etahi o nga hapa kei roto. E whirinaki ana te Kawanatanga ki te tautoko a RTM kia puta ai te ihu o te pire.

Te whakatau a Reipa mo te mahi tuarua a te tangata

Kua puta te whakatau i a Reipa, mena ra ka whai mahi tuarua te tangata, i tua atu i taana mahi matua, ka kore ia e taakehia mo tera mahi tuarua aana. I puta tenei kaupapa a ratou i taa ratou hui nui i nga rangi whakataa nei, a, i reira, ka rere nga mihi ki a David Cunliffe, kaitorangapu tautohito e heke nei i ona turanga i roto o Reipa, hei te kowhiringa pooti a tera tau. Hei taa Henare Kingi, kaitaatari torangapu, e tika ana kia mutu te mahi a Cunliffe.

Follow us on &

Copyright © 2016, UMA Broadcasting Ltd: www.waateanews.com