November 03, 2016
David Taipari mo te Kaunihera o Tamaki Makaurau
David Taipari mo te Kaunihera o Tamaki Makaurau
Kua pootihia ano a David Taipari o Marutuahu hei toihau o te Uepu Tohutohu Maori o te Kaunihera o Tamaki Makaurau. Ko Glenn Wilcox o Ngati Whatua te toihau tuarua. Hei taa Taipari, e manawareka ana tona ngakau, koia ano te toihau, a, ka riro ano maana te Uepu e arahi i roto i taa ratou mahi i te taha o te Kaunihera, ara, i roto i taa ratou tohutohu i te Kaunihera kia uu ki nga matapono o Te Tiriti o Waitangi, otira, kia hapai i te mana o nga iwi kainga me nga iwi maataawaka kei Tamaki e noho ana.
Aotearoa e tautoko ana i te iwi taketake o Standing Rock
E tika ana kia whakapuaki korero a Aotearoa e pa ana ki te tukinotanga o te iwi taketake o Standing Rock i Amerika. Koira te whakapono o te kaiarahi i te roopu Reipa o Andrew Little. Kei te kino haere te wairua o nga tukinga i waenganui i nga uri o te iwi Sioux me nga pirihimana, na runga ano i te kaha o te aatete atu o nga uri Sioux ki te whakaaro o te Kawanatanga o Amerika kia whakatuuria he ngongo kohinu ki runga i to ratou awa tapu. Hei taa Little, me whakapuaki korero a Aotearoa kia kite ai te ao i to tatou pumautanga ki te Kawenata Tika Iwi Taketake a Te Whakakotahitanga o te Ao.
Te ra tika mo nga riri whenua o konei
Me whakaaro ano tatou, ko tehea te ra tika hei maumahara ma tatou i nga riri whenua o konei. Koira taa te kaiarahi i a Aotearoa Tuatahi, mangai torangapu hoki mo te Raki, a Winston Peters. Kua tohua e tetahi roopu, ko te rua tekau ma waru o Whiringa-a-nuku hei ra maumahara ki nga riri whenua, koia hoki te ra i waitohua ai te Whakaputanga o te Rangatiratanga o Niu Tireni i te tau kotahi mano, waru rau, toru tekau ma rima. Kaore te tokomaha o nga kaumatua o Ngapuhi i te whakaae ki taua ra, a, hei taa Peters, te ahua nei kaore te roopu i whiriwhiri i te ra, i paku marama ki tenei mea, ki te hitori.
He hui ma nga matua i whai wheako kino
Hei te tekau ma waru o tenei marama ka whakahaerehia he hui ma nga maatua, i whai wheako kino, i a ratou e whakapaa atu ana ki te Tari Tamaiti Taiohi Whanau. Ko Raewyn Kapa te kaihautuu i te hui, hei taana, ahakoa kei te tauwhirowhirotia te Tari Tamaiti Taiohi Whanau ki raro i te maru o tetahi manatu hou, ara, te Manatuu Tamariki Whakaraerae, ehara i te mea ma reira ka kore nga raruraru kua wheako nei nga maatua. Hei taana, ahakoa pehea, e noho wairua kaikiri tonu ana taua tari, taua manatu ranei ki nga whanau Maori.
Te marama mate huka
Koinei te marama mate huka, puta noa i te motu, a, hei taa Mate Huka Aotearoa, he hauwhaa miriona taangata o tenei whenua e paangia ana e te mate nei. Hei taa te tahuhu rangapu, a Steve Crew, wha tekau taangata ia ra ka tohua ki taua mate, a, tokomaha rawa o ratou he Maori. Kei te whakaterehia e Mate Huka Aotearoa he kete moohiohio i te ra nei, hei awhina i te tangata ki te kai i nga kai totika, ki te whakangungu hoki i te tinana, kia kore ai te mate huka e paa.
Copyright © 2016, UMA Broadcasting Ltd: www.waateanews.com