Listen Now: 
He mihi ki a Whaanau Ora
Kua tuu te Minita Take Puutea a Bill English ki te whakanui i a Whaanau Ora me ana puunaha moohiohio.
Ko tana kupu ki te hui o Te Pou Matakana he nui kee nga tirohanga e whakahaerehia ana ki te whakamaatautau i te kaupapa no reira he tauira pai a Whaanau Ora ki nga tari kaawana katoa.
Hai taa English ano kei te tuu etahi ki te whakahee i a Whaanau Ora engari te mea kee kei te kite i ona painga.
He wero
Me whakarite huarahi kia ahei ai te ine i nga otinga e paa ana ki nga mahi a Whaanau Ora.
Koia te wero kua whakatakotoria e Nanaia Mahuta o te roopu Reipa hai tirohanga atu ma nga ratonga.
Hai taana he aawangawanga noona kaahore ano kia whakaurua nga mahi a nga tari kaawana ki te tauira o Whaanau Ora me te kii ko te wero kia rutu i te hanga tiitaha o te puunaha araa ko etahi whaanau ka mirimirihia ko etahi atu ka paakinotia.
Te Tiitahatanga
Ka puta tetahi puurongo i tenei wiki e titiro atu ai ki te hononga o nga tumanakotanga kaiako mo o ratou tauira me te takanga o nga aakonga Maori i te kura.
Hai taa kaituhi Anton Blank ka herea, ka taaronatia nga tamariki Maori me to ratou tupu i te kura na te kino o nga whakaaro whakahaawea mo tatou a iwi nei huri noa te motu.
Hai taana ano mehemea ki te whakamaarama atu ki nga kaiako te ahua o o ratou whakaaro tiitaha ka pai ake o ratou piringa ki nga tauira Maori.
He haerenga toi
Tokotoru nga kaitoi Maori ka haere ki te taone o Seattle Amerika ki te whai waahi ki te haerenga hoe waka o te Kaahui o nga Iwi Taketake o taua rohe.
Ko Ihaia raaua ko Marissa Puketapu ko Waikarere Gregory hoki te tokotoru nei atu i te hoe waka ka whakaatu hoki o ratou puukenga toi ki tena hapuu, ki tena hapuu iwi taketake e toro atu ai ratou.
Lindauer, kei hea ana waituhi
Tera pea ko te waituhi e tare ana ki te paatuu o to whare na te tohunga toi a Gottfried Lindauer i tuhi.
No konaa kei te karanga atu te Whare Toi o Taamaki ki te iwi whaanui kia rapuhia nga mahi a taua kaitoi rongonui ki to kaainga, ki to marae.
Hai taa kaiwhakahaere toi a Nigel Borrell e hia kee nga waituhi a Lindauer kaore ano i kitea me te mohio naana te tokomaha o nga rangatira Maori i waituhi i tera atu rau tau.
He aawhaa kei te haramai
Akuanei ka mutu te whitinga o Tamanuiteraa ka hau mai ko te aawha.
Koia te korero a te tari huarere i tenei rangi me te matapae e whakatata mai nei ko te ua waipuke me te hau puukeri 140 kiromita ia haora.
Ka paakinotia a Waitaha, a Waiharakeke, a Poneke me te Wairarapa apopo.
Heoi ano a te Taite ko te hukarere te korero ki nga maunga o te Waipounamu.
Copyright © 2016, UMA Broadcasting Ltd: www.waateanews.com
RELATED NEWS
