July 08, 2016
Whareherehere.
Whareherehere.
Na runga i nga kaupapa haamene a Minita Ture a Judith Collins kua piki haere te maha o nga mema keenge ki roo whare herehere ki te 30 paiheeneti.
Koia te tirohanga a kairangahau Kim Workman o te Whare Waananga o Wikitoria kaahore te puunaha ture e whakawehewehe ana i nga kaihara taiohi me nga mema tautoohito o nga keenge.
Aapiti atu he kikii ake nga tikanga utu here araa bail conditions no konaa ka hopukia nga rangatahi i reira.
Whaanau ora.
Kua hui tahi nga ratonga Whaanau Ora o te Waipounamu i Otautahi ki te matapaki i nga wheeako me nga painga o te mahi.
E meingatia ana ka whai nga ratonga i tetahi huarahi kia kite i nga otinga mauritau aa ka titiro hoki me pehea e whakatupu i te kaha, i te maaramatanga, i te maarohirohi o nga whaanau.
Ka korero ngaatahi nga roopu Whaanau Ora o te Ika a Maaui i Taamaki a tera wiki.
Tirohanga Maori.
Me whai i te reo me nga kaupapa Maori kia whaanui te titiro ki nga ahuatanga o te ao Maori.
Koia te hiahia o Taakuta Maria Bargh upoko hou o te Kawa a Maaui te tari Maori i te Whare Waananga o Wikitoria i Poneke.
Ki a ia ano he nui nga hononga o tana tari ki nga kaitoorangapuu Maori, ki nga tari kaawana, ki nga roopu Maori no reira e tika ana kia poipoia aua hononga kia pakari ai.
Wharewera.
Kua wera rawa atu te maakete whare o Aotearoa no konaa ka kore te tokomaha e ahei ana ki te hoko whare.
Ki etahi tohunga oohanga e tika ana kia whakahekea nga utu whare ma te 40 paiheeneti me taa ratou kii ka taea e nga whare puutea tetahi hekenga pera te whakahaere.
Ko te mea kee ka nui te tini o nga kaipupuri whare e patua kinotia mehemea ki te whakaheke maarika i nga utu.
Puutea kupu.
Kua whakaraarangitia he puutea kupu Maori ki runga i a twitter ko te reo tuupuna te iingoa.
He hootaka hou tera kei te whakaarahia ake e te Runanganui o Ngati Hikairo.
Kua hopukia te reo e korerohia ana i roto o Kaawhia, Waikato me Ngati Maniapoto.
Kaati ko etahi kupu kaahore e rongohia ana ki waho o era rohe a iwi.
Whakapara aukatinga.
Kua aukatingia te huarahi ki waho o te marae o Whakapara ki te raki o Whangarei i tenei ata kia kore nga kaimahi keri matuu e piki ki taa ratou waahi mahi i reira.
Ko te hiahia o te haukaainga kia whakamohio atu ki te kamupene kerikeri o Evolution Mining kaahore e pai ana kia kuhu atu ratou ki te mahi i a ratou mahi tuukino whenua i reira.
Ka mutu kua roa a Ngati Hau e tautohetia ana te taenga atu o era momo roopu ki roto i a ratou.
Copyright © 2016, UMA Broadcasting Ltd: www.waateanews.com