July 04, 2016
He huarahi puutiotio
He huarahi puutiotio.
Kua ngahoro nga korero ki te whakarite roopu hai whakahaere i nga kaupapa korero a Ngapuhi ki te Karauna mo te whakataunga Tiriti o Waitangi a te iwi.
Ki etahi me whai waahi nga roopu noho taone ki nga whakaritenga, ki etahi atu,waiho ma nga hapuu anake ki te whakahaere i tetahi roopu korero.
Hai taa Pita Tiipene na runga i nga uauatanga ka hoatu kee ki tetahi roopu nohinohi ko Te Hononga Iti te iingoa ki te whakahaere i te tukanga.
He whakahoutanga o nga mahi tautoko.
Ka huri nga kaiwhakahaere hauora ki te whakahou i nga ratonga aukati kaipaipa.
E mea ana te kaawana ka titiro kee ratou ki nga ratonga haapori me te tohanga o te nuinga o te puutea tautoko ki era roopu.
Kei te kii a Taakuta Marewa Glover kairangahau take tuupeka ka rangirua te whakaaro o etahi kia waia ratou ki nga whakaritenga hou, ki nga hononga hou.
Davidson kia piripono taatou.
Kua tiimata te wiki o te reo Maori i Poneke me tetahi hiikoi ki nga huarahi o taua taone nui kia kitea nga ahuatanga o te reo.
I reira a Maarama Davidson o nga Kaakaariki hai taana kua whakaaturia te piripono ki te pupuri tonu ki te reo mo nga whakatupuranga a muri.
Hai taa Davidson me whakarite i te reo hai kaupapa whai kiko ki o tatou kura.
Wiki Pukapuka.
Ko te wiki tenei o te reo Maori ko te wiki hoki mo nga pukapuka kaawanatanga.
Ka tuku tohanga te kaawana ki te hootaka pukapuka e kiia nei ko Duffy Books.
E mea ana a Hekia Parata Minita Maatauranga e hia kee mano taamariki ka whiwhi koreutu i tetahi pukapuka ki te kawe atu ki te kainga.
Hai taana ano he kaupapa tera kia tupu ai te aroha o te hunga tamariki ki te paanui pukapuka, ki te whakapai ake i o ratou puukenga tuhituhi me te paanui.
Ratonga Wai.
Me whakarite ano i te puutea hai whakapai ake i te ahua o nga ratonga wai ki nga haapori taiwhenua.
Haaunga ano nga taone nunui hai taa Te Ururoa Flavell Minita Whanake Maori he nui nga hiahia o nga haapori iti me nga kaainga Maori pera i te moutere o Matakana, i a Katikati, i a Te Kao,ki nga ratonga mauritau engari he iti nga rawa tautoko e tohatoha atu ai ki a ratou.
He taonga te reo.
Ka nui te tini taangata i tae atu ki nga huarahi o Poneke ki te tautoko i te hiikoi hai whakanui i te wiki o te reo Maori.
Hai taa Ngaahiwi Apanui toihau o te Taura Whiri i te Reo Maori ko te kaupapa o te hiikoi he akiaki i nga haapori ki te korero i te reo, ahakoa ki hea.
Hai taana ano ko te tikanga kia whakatahuri i nga whakaaro o te haapori whaanui na te mea i tenei waa tokomaha ake e whakahee ana i te hunga e whakaae ana ki te oranga o te reo Maori.
Copyright © 2016, UMA Broadcasting Ltd: www.waateanews.com