Listen Now: 
E tika ana me aata titiro ki nga tikanga whakahaere mo te tohanga hao ika.
Hai taa Meetiiria Tuurei rangatira takirua o nga Kaakaariki, me aro nga kamupene hao ika ki nga whakapae a nga kairangahau.
Araa kei te hee te karanga a aua kamupene mo te rahi o nga ika e hopukia ana e ratou.
Hai taa Tuurei ano, i te mutunga ake kua tata ngahoro etahi tauranga ika aa e tupu haere ana te aawangawanga o nga iwi.
Tarutaru huakore
Na te piki haere o te kaitarutaru, kua piki hoki ko te tuukinotanga.
Koia te korero a Maarama Fox o te Paati Maori whai muri i te matenga o koohungahunga Moko Rangitoheriri o Taupo me te herenga o nga taangata e rua.
Hai taa Fox ano, ka hiikoi ia i te kaupapa whakahee tuukino ki Wairoa a enei raa whakataa.
Ka hiikoi etahi atu i te Taitokerau me Otautahi ki te whakaputa i nga aawangawanga mo te tuukino.
He Kuia Whai Mana
I tenei raa ka tanumia a kuia Huia Koziol o Ngati Kahungunu.
Naana te ao kiriata i kawe atu ki te Wairoa.
E meingatia ana, i ona raa i whakaara ake i tona iwi ki te tautoko i te mahi a te hunga hanga kiriata huri noa.
Kua tukua te kuia raka ki te koopu o te whenua, no reira e te whaea takoto mai, moe mai raa.
Te Maakete Whare
Taa te mea kai te paakinotia a Aotearoa katoa.
Me uru atu te kaawana ki te aata whakatau i te maakete whare o Taamaki Makaurau.
Koia te whakahau a Andrew Little rangatira o te roopu Reipa, me tana kii ka whakakore ratou i nga aarai whakatuutuu whare kei nga tahataha o Taamaki.
Hai taa Little ano, ko nga roopu whai rawa anake ka koti i nga hua pena waiho aua aarai.
Copyright © 2016, UMA Broadcasting Ltd: www.waateanews.com
RELATED NEWS
