Listen Now: 
Kei te titiro te roopu Kaakaariki ki nga whakaritenga mo te paanga o nga whaanau ki o ratou whanaunga i te waa o te mate.
Na te aawangawanga kaahore te maha o nga whaanau Maori e whakaaetia ana kia noho tahi ki te tuupaapaku.
Kei te kookiri nga Kaakaariki i tetahi pakirehua a paaremata kia aro ai nga kaiwhakahaere ki nga tikanga a ahurea o nga whaanau pani.
Hai taa Maarama Davidson maangai take Maori o nga Kaakaariki, ka nui te tini o nga whaanau Maori no nga hau e whaa me taawaahi hoki ka aawangawangatia.
E kore e tuohu
Kua noho ki tahaki a kaumaatua Kiingi Taurua ina tae atu te kaawana ki te marae o Te Tii Waitangi, kia tau te puehu i reira kia maene te marae hai te raa o Waitangi a tera tau.
I aukatingia te whakaekenga o te Piriimia ki runga i taua marae i tenei tau na te mea hai taa Taurua, na John Key te kirimana TPPA i haina.
Patipati me nga kaihara
He wahawaha te hunga kei te hoatu puutea ki nga piinono, engari ka utua hoki ko nga kaihara.
Koia te karere a nga Piriihimana ki te Kaunihera o Poneke i mua mai i te hui ki te matapaki i nga piinono me nga raruraru e paa ana ki a ratou.
Ki taa te tari ano, me mohio nga taangata oha kei nga rori etahi nanakia e taakehia ana te hunga patipati he momo hara tera mahi.
Kaakaariki whakahee
Ahakoa te whakaaro o nga iwi kia whai waahi ratou ki te hii ika ki nga moutere o Rangitahua he rerekee te whakaaro o te roopu Kaakaariki.
Hai taa rangatira takirua a Meetiiria Tuurei, me aukati i nga mahi hao ika a nga pakihi katoa ki reira.
Ki a ia ano he waahi motuhake te rohe moana e karapoti ana i aua moutere, no reira waiho tonu kia urutapu te ahua.
Waitara whenua
Kia maaeneene te huarahi o te pire kaunihera kia whakahoki he porohanga o te whenua e kiia nei ko Pekapeka i Waitara ki a Te Ati Awa.
Koia te korero a Liana Poutuu tiamana o Te Kotahitanga o Te Atiawa Trust me taa ratou whakatau kia korero tootika ki te Kaunihera
o Ngaamotu mo te kaupapa. Hai taana ano, kei te tautoko te Kaunihera i te pire kia hoatu etahi poraka
whenua ki te iwi me te whakatuuranga o tetahi poari whakahaere whenua, 50 paiheeneti o taua poari ma Te Atiawa e whiriwhiri.
Copyright © 2016, UMA Broadcasting Ltd: www.waateanews.com
RELATED NEWS
