March 21, 2016
Huka taake
Taakehia te huka, kaua ranei e taake huka, ko teehea?
Ahakoa te whakakaahoretanga o Aotearoa ki te whiu taake ki te huka i nga marama pahemo, kaare a Piritana Nui i koorapa ki te haamene i tera o nga kai kino mo te hauora.
Ahatia he kaupapa tautohenga nga paanga o te huka hai whakaarotanga mo te kaawana akuanei.
Utu whaanui
Kia 200 taara ia wiki hai hoatutanga ki nga pakeke katoa, koia te whakaaro o te roopu Reipa i tenei waa.
E mea ana te korero, ma taua utu ka tango atu i te aawangawanga o te hunga whiwhi penihana, me nga kaimahi e utua ki te utu paapaku.
Heoi ano ki etahi, he korero noa iho tera a Reipa. Kaahore ratou e tino piripono ana ki tetahi utu whakaora pera rawa te nui.
Rautaki rapu hinu
Kei te whakatairanga te kaawana i taa ratou rautaki rapu hinu pau te kaha.
Kei te hiahia kia whakatuuwhera i te whaanuitanga o te moana 525 mano kiromita porowhaa te rahi kia rapu te hinu ki reira.
Ka tirohia nga rohe moana atu i Taranaki Waikato, Te Taitokerau, Te Tairaawhiti me Waitaha.
Hai taa Minita Puungao a Simon Bridges kua korero kee ki nga iwi.
Ngahuru mahana
Kua tae kee tatou ki te waahanga o ngahuru engari kei te mahana tonu.
Tata ki te 30 te paamahana o etahi rohe i tenei raa, engari ka rerekee te korero a nga raa o te Aranga araa ka maakuu, ka hauhau.
Heoi ano…kua mahana ake nga korero huarere inaianei mehemea ki te whakaritea ki nga rangi ngahuru o mua.
Poroteehi
Tokomaha nga kaiporoteehi o te roopu Greenpeace kua tae atu ki te whare nui o Sky City ki te aatete i te hui nui o nga kamupene hinu.
Kei roto a Minita Puungao a Simon Bridges e karanga ana i nga rohe moana e hokona atu ai hai waahi tuuhura hinu i tenei tau.
Hai taa Greenpeace, ahakoa kaare ano i kitea te hinu i te hoohonutanga o te moana, ka utu puutea tonu te kaawana ki te koowiriwiri.
Aranga
He aha e kati ai nga toa hokohoko i te aranga?
Koia te paatai a etahi me te kii kua mahue i te nuinga to ratou whakapono ki te Atua na reira me waiho nga kuaha kia tuuwhera tonu.
Heoi ano ki etahi, kaahore e pai ana kia tohungia tatou ki te mahi i te waa o te hararei nui.
Kaati, kei te haere tonu nga korero tautohe mo te kaupapa me te rangirua o te tokomaha ko tehea te huarahi tika.
Copyright © 2016, UMA Broadcasting Ltd: www.waateanews.com