Tikanga hou mo nga Kiwi.
Ko nga tikanga hou mo nga Kiwi kia noho tuuturu i Ahiteriria he hiikoitanga i te aronga tika.
Kua whakaritea he tohu hou hai hoatutanga ki era o tatou e taea ai nga paearu a Ahitereiria te whakatutuki pera i te whiwhinga o te puutea a mahi 53 mano taara neke atu ranei ia tau,ia tau mo nga tau e rima.
Hai taa Maarama Fox rangatira takirua o te Paati Maori kei te tika te aronga o nga whakaritenga engari he nui rawa te utu 53 mano taara ia tau kua karangahia e Ahitereiria.
Aukati parakino.
He pai te kii taurangi a te Kaunihera o Taitokerau kia aukati i te kuhuna o nga kau nga puuru me nga hipi ki nga awa o te rohe engari he aawangawanga no Kelvin Davis o Reipa ki te pooturi o nga mahi nei.
Kotahi hautoru o nga paamu kaahore tonu e whai ana i nga tohutohu nei hai taa Davis ano he nui tonu te pakarutanga a nga kau ki nga tahataha awa huri noa me te kitenga o te parakino.
Mahere reo.
Haramai te ahua o te mahere reo Maori a Waikato Tainui.
Ka nui te tautoko o te Taura Whiri i te Reo ki taua kaupapa me te kii a toihau Ngahiwi Apanui he whakakitenga hao nui tera hai whakatutuki i nga moemoeaa o te iwi.
Hai taa Apanui ma nga mahi huhua a nga iwi to tatou reo e pupuri atu i tera he tuuranga hoki taa te puutea tautoko.
Otautahi huritau.
E maumahara ana a Otautahi i nga patunga 185 o te ruu whenua i tenei rangi te tau tuarima no te ngaaueuetanga o te whenua i reira me te pakarutanga o nga whare maha.
14 mano nga ruu iti kua rongohia mai te tau 2011 14 mano hoki te maha o taangata kua wehe atu araa kua huunuku ki waahi kee ko etahi kiihai ano kia hoki mai.
Ururoa tirohanga.
Ka aru te Minita Maori i te whakatinanatanga o etahi tikanga hou ki roto o Irirangi Aotearoa mo te whakakapinga o nga kaupapa Maori.
Hai taa Te Ururoa Flavell kaahore ia e pai ana ki te ruarua o nga ahuatanga Maori e rongohia ai ki taua teihana o te motu.
Ki a ia ano taa te mea he kaiwhakapaaho a motu a Irirangi Aotearoa e tika ana kia kaua ratou e whakapaa atu ki nga mea auraki i nga waa katoa.
Pire rongoaa.
E mea ana te roopu hoko pire rongoaa a te kaawana e mohiotia nei ko Pharmac na te hainatanga o nga kirimana ki te roopu hauora Maori kua whakakaha i nga ratonga ki nga haapori.
Kua haina whakaaetanga a Pharmac ki te Ohu Rata me te Kaahui Whaanau Ora o Taamaki heoi ano hai taa Atene Andrews kaiwhakahaere Maori o Pharmac ko te hiahia kia hoko i nga pire rongoaa e haangai puu ana ki te oranga o tena haapori, o tena haapori.
Copyright © 2016, UMA Broadcasting Ltd: www.waateanews.com
