Listen Now: 
Whakapaa atu ki nga iwi katoa.
Kaahore a Irirangi Aotearoa e whakatau ana i to ratou tuuranga ki te whakaata i nga haapori katoa i nga iwi katoa pera i te Maori.
Koia te tirohanga a Derek Fox tautoohito ki nga whakaritenga papaaho na te iti o nga ahuatanga Maori e rongohia ana ki tera o nga teihana o te motu.
Hai taana ano ehara i te mea he ratonga a Irirangi Aotearoa i whakatuuria ki te korero mo te ao Paakeha anake.
Reipa maatauranga.
Ma te kaupapa hou a Reipa mo nga take maatauranga ka whai hua te Maori.
Ko te hiahia o Reipa kia kuhu atu nga rangatahi ki nga kura tuatoru mo te koreutu hai te roanga o te waa.
Hai taa Andrew Little rangatira o Reipa he pai nga whakautu ki taua hiahia me tana whakapae ka hiki ake i nga taiohi e manawapaa ana ki te whai i te huarahi ako o te maatauranga.
Aahua o nga hoia.
Kei rapu a kairangahau Monty Soutar i nga ahua o nga hoia Maori i tae atu ki te pakanga tuatahi o te ao.
Kei te tuhituhi tonu i tana pukapuka e kiia nei ko Whiitiki Maori in the First World War ka whakaputaina a tera tau.
I roto i ona tau rangahau, kua huraina te maha o nga moohiohio, ko nga reta, ko nga whakaahua ko nga raataka kei te pupuritia e nga whaanau.
Kei te waahi ipurangi o te roopu 28 nga korero whakamaarama araa me tuku atu i te taaruatanga o nga whakaahua ki hea.
Ahuwhenua whakataetae.
Tera tonu pea ka riro ma tetahi kaiahuwhenua o te Waipounamu te kapu ahuwhenua o te tau.
E rua o nga paamu e toru kei te whiringa toa no te tonga.
Hai taa Kiingi Smiler tiamana o te komiti ahuwhenua ahakoa nga uauatanga i te ao ahuwhenua i tenei waa ko te hiahia o nga paamu Maori nei kia tuku i o ratou mohiotanga ki etahi.
Te Papa whakahoki taonga.
Haere taonga atu, hoki taonga mai.
A te marama o Poutuuterangi ka whakahoki te Whare Pupuri Taonga i tetahi korowai motuhake ki Hawaai araa ko te korowai me tetahi potae maaroo i takohatia ai ki a Kaapene Kuki i te tau 1779.
A muri atu ka whakaatu i nga taonga kaamehameha nei ki Honolulu.
Hai taa Arapata Hakiwai kaihautuu o Te Papa he honore nui ki te whakahoki i taua taonga ki o tatou whanaunga o era moutere.
Rautaki reo.
Ko te haangarau te ahuatanga hai whakatutuki i te hiahia o Waikato Tainui kia 80 paiheeneti a ratou kaikorero Maori i te tau 2050.
A enei raa whakataa ka whakarewa i te rautaki reo o te iwi e kiia nei ko Tikanga Ora Reo Ora.
Hai taa Raahui Papa tiamana o Waikato Tainui he nui tonu te mahi kei mua i a ratou ki te whakatatuu i te kaupapa.
Copyright © 2016, UMA Broadcasting Ltd: www.waateanews.com
RELATED NEWS
