September 16, 2015
Ture Whenua
Ture Whenua
Ehara i te mea he karanga ohorere te whakautu a nga kaiwhakawaa Maori ki te tuhinga hou o te Ture Whenua Maori.
Hai taa Meka Whaitiri o te roopu Reipa e mea ana nga kaiwhakawaa o te Kooti Whenua Maori kaahore nga kaituhi o te ture hou e maarama ana ki nga whakahaere e paa ana ki te ture o naianei.
Hai taa Whaitiri ano he kitenga tera o te aronga huakore a te Paati Maori me taa ratou mahere whakahou.
Ngati Hine hui
Ka hui a Ngati Hine i Kawakawa a te po nei ki te matapaki i nga kitenga me nga tohutohu a te Taraipiunara o Waitangi e paa ana ki te mana korero o Tuuhoronuku.
Hai taa Waihoroi Shortland tiamana o Ngati Hine e ai ki te puurongo a te Taraipiunara e tika ana me aro ki te haa, ki te tino rangatiratanga o nga hapuu me te mea nei ko tera korero
kei te tautoko i te tuuranga a te iwi raa kaua ranei e waiho ma Tuuhoronuku ma wai atu to ratou ake huarahi e whakahaere.
He Tuuranga Hou
E rapu ana i tetahi kaiwhakahaere ki te kookiri i te piki haere o nga tauira Maori ki nga kura.
Hai taa Hekia Parata Minita Maatauranga kua whakarite puutea ki taua tuuranga aa ka utu tonu i nga kaiwhakahaere a rohe.
Hai taa Parata ano he hootaka whakahirahira te whakaritenga o nga kaiwhakahaere na Te Akatea ko te roopu o nga tumuaki kura i whakaara ake hai taapiritanga ki te haapori o nga kura
me te paanga o nga tauira Maori ki to ratou uaratanga.
Tangata Whenua
Ko Tangata Whenua te iingoa o te pukapuka i toa ai te whakataetae Nga Kupu Ora mo tenei tau.
Ko Atholl Anderson ratou ko Aroha Harris ko Judith Binney nga kaituhi hai taa Anderson e whitu tau te roa ki te tuhituhi i te pukapuka raa.
Hai taana ano ehara tana pukapuka i te kohinga o nga korero tuku iho a nga iwi engari ka aro ki nga tirohanga maha. I mate ko tetahi o nga kaituhi a Judith Binney i te tau 2011.
Mate pukupuku
Ko tenei te marama hai whakawhaanui i te tirohanga ki te mate pukupuku ki te wharetangata o te wahine araa cervical cancer.
No konaa e whakapau kaha ana nga ratonga hauora Maori kia kore nga waahine Maori e mataku, kia tau te wairua ma reira ka tahuri ki te whai whakamaatautau.
Kei te heke haere te maha o nga waahine e whakamaatautauhia ana koia etahi ratonga i whakarite ai nga whakamaatautau pera mo te kore utu.
Hiikoi mo Tara Brown
A te Paraire ka tuu tetahi hiikoi ki Ngaaruawaahia hai whakamaharatanga ki a Tara Brown e whakapae ana i koohurutia e tana hoa i tera wiki i Ahitereiria.
E mea ana nga Piriihimana i te rohe o te Gold Coast kua uuhia te whakapae o te koohuru ki runga i a Lionel Paatea te hoa o mua o te patunga.
Ki nga kupu o te waa ko te maangai o te Whare Whakaruruhau Waahine tetahi ka korero ki te hunga hiikoi.
Rotoiti whenua
Tangohia atu te tohu haapori mai te huarahi o Tamatea Street taha raawhiti o Rotoiti.
Koia te karanga a te Komiti Rautaki a te Kaunihera o Rotorua waihoki mehemea ki te whakaae te Kaunihera whaanui a tera marama ka waatea a Ngati Tamateatutahi ki te tuku tono ki te Kooti Whenua Maori
mo tetahi tohu huarahi ma reira ka whakahoki i te whenua i reira ki nga kaipupuri whenua taketake.
Kaati ko te whenua kei te karapoti i te huarahi o Tamatea i murua hai hanga taone i te tau 1897 engari kiihai taua taone i whakatuuria.
Key raaua ko Turnbull
Ko nga ratonga toko i te ora ki nga Kiwi kei Ahitereiria e noho ana.
Koia tetahi o nga kaupapa tautohenga hai korerotanga ma John Key me te Piriimia hou o Ahitereiria a Malcolm Turnbull.
Ahakoa te whakapae ka tata te hononga i waenga i a raaua kei te kii etahi ko tera take toko i te ora te tino whakamaatautau e tuu mai nei.
Ko te mea kee ka poto te waa ki a Turnbull kia tau ai te puehu o tana pikinga ohorere ki te tuuru tiketike taa te mea he waa pooti ano kei mua i a Ahitereiria a tera tau.
Copyright © 2015, UMA Broadcasting Ltd: www.waateanews.com