Listen Now: 
Karahipi reo
E tika ana me whakarite karahipi hai hoatutanga ki te Maori kia ea i nga tuukinotanga o mua i whiua ki nga whakatupuranga mo te korero Maori i te kura.
Koia te karanga a Dover Samuels mema paaremata o mua me tana kii i tohungia nga tamariki ki te korero Paakeha anake i te taenga atu ki te kura.
Hai taa Samuels ano ko taua kaupapa whakakore reo tetahi waahanga o te rautaki ki te whakaheke i te mana Maori.
Toko i te ora.
Whakamutua te whakaurunga o nga kaupapa toorangapuu ki te puunaha toko i te ora.
Koia te whakahau a Hirini Kaa o te haahi Mihingare me tana aawangawanga ki te hanga mataini o taua puunaha.
Kai te hui nga maatanga oohanga, hauora, take paapori hoki ki te matapaki i nga kaupapa hou hai haapai ake i nga whaanau.
E mea ana a Kaa hangaa he puunaha maamaa e taea ai te whakamahi mo te oranga o nga whaanau.
Hauora hui
E whakahaerehia ana he hui nui mo nga kaimahi Maori kei nga kaupapa o te hauora i tenei wiki ki Otepoti.
Ka whakakapi nga take maha atu i nga maauiuitanga huhua ki nga tikanga auahi kore o te waa whakawhiti atu ki nga momo whakahaawea e rongohia ana e te Maori kaimahi mai, tuuroro mai.
Heoi ano ka titiro ki nga paanga o era ahuatanga ki nga whaanau Maori me nga huarahi hai whakapai ake i to tatou hauora.
Syria te hunga whakaruru.
A tera wiki ka whakauru a Reipa i tetahi pire paaremata kia kuhu mai te maha atu o te hunga whakaruru ki roto o Aotearoa i tenei tau.
Hai taa Andrew Little rangatira o Reipa kaua a Aotearoa e maatakitaki noa iho i te waa e koropupuu ana ko te tuukinotanga o nga iwi i Syria, i hea ranei.
Hai taa Little ano ka taea e tatou nga whakaruru 750 te whakaora i tenei tau tonu ma to ratou kuhuna mai ki konei noho ai.
Whanau ora he puurongo.
Kua tino whai hua nga whaanau i raro i te tirohanga a Whaanau Ora.
Koia te korero i nga puurongo i wetewete ai te ahua pehea o te kaupapa raa mai te tau 2010 ki 2014. Ko te mea nui ko te whakaritenga o nga hiahia o te whaanau ki waenganui.
Ka whakaputa i te puurongo raa a tera wiki ko reira whakatakoto ai nga kitenga whaanui.
Copyright © 2015, UMA Broadcasting Ltd: www.waateanews.com
RELATED NEWS
