Otautahi ahu pehea.
Tera pea ka ngaro te maha rawa atu o nga tuuranga mahi mo te hanga whare i Otautahi.
Ki taa te korero a te whare puutea o Westpac me whakarite mahere te kaunihera i reira mo te ahu pehea o nga kaimahi a muri atu i te tau 2022 te waa e oti ai nga mahi whakahou.
Heoi ano ma te tiingongo haere o roopu tuumahi i Otautahi he wehi no etahi kai paakinotia nga akoranga mahi a rehe.
He hootaka mo Tuhoe.
Kua whakaritea he pakipuumeka e te kamupene hanga hootaka pouaka whakaata o Maaui he pakipuumeka reo Maori.
Nga Taangata Taumata Rau – Nga Tamariki o te Kohu koia te iingoa o te hotaka hou a Maaui ka whakatakoto kupu nga kaikorero o Ngai Tuuhoe i to ratou ake reo a iwi.
26 nga waahanga korero ka whakapaahotia ki runga i a Whakaata Maori atu i te po nei.
Ohanga Maori i Taamaki.
Mehemea ka pai te oranga o te oohanga Maori kei Taamaki ka pai hoki te oohanga whaanui o te rohe.
Koia te tirohanga a David Taipari tiamana o te Poari Maori o te Kaunihera o Taamaki i runga i te mohio kua tupu matomato te waariu o nga rawa a te Maori.
Kaati kei te hui tahi nga kaiwhakahaere puutea Paakeha i te raa nei ki te matapaki i nga kitenga o te puurongo mo te oohanga Maori kua tukua mai.
Hai aha i te puuhiko.
E piki haere ana te aatete ki nga puuhiko hai tao ma nga Piriihimana huri noa.
Te ahua nei ko nga kaitoorangapuu Maori kai te aarahi i taua whakahee.
Ko Meetiiria Tuurei tetahi e kii ana me huripoki i te kaupapa na te mea ko te Maori
ka patua, ko te Maori ka paakinotia pena mau puuhiko nga aapiha katoa.
Aaraia te tuukinotanga.
Kia mauritau te raarangi o nga ture hai aarai i te tuukinotanga.
Koia te korero a Amy Adams Minita o nga take e paa ana ki te Ture i tenei rangi tonu e waatea nei te haapori whaanui ki te whakaputa whakaaro mo te tuukino tae atu ki te 18 o Mahuru.
Hai taa Adams ano ko te ture te pou herenga o te whakautu ki te tuukinotanga engari ehara ma te ture anake taua raruraru e whakatika.
Miraka utu pakaru.
Kua tino whara nga kaiahuwhenua Maori na te hekenga o te utu miraka.
Hai taa Hiku Cherrington kaipaamu i te Taitokerau e rongo ana i te mamae te hanga nei kua heke te utu o te miraka puehu penei me te koohatu.
Hai taa Cherrington ano tera pea ka huri te kaawana ki te turuki i nga mahinga ahuwhenua me nga taimahatanga a puutea kei te patu haere i te katoa.
Copyright © 2015, UMA Broadcasting Ltd: www.waateanews.com
