Listen Now: 
He wehi pea no te kaawanatanga.
E mea ana te roopu Kaakaariki he mataku no te kaawana ki nga whakapae ka whakapeehi i nga motika Maori mehemea ka whakatuu i te kirimana tauhokohoko o te TPPA.
Ka puta te whakatau a Taraipiunara o Waitangi apopo me kore e whakarongo koohukihuki ki aua whakapae.
Hai taa Meetiiria Tuurei rangatira o te roopu Kaakaariki kua whakaarahia ake e te Maori o tatou aawangawanga mo nga rawa a hinengaro me nga korero kaahore e rongohia ana.
Nga hootaka haapai ako.
Toru tekau maa iwa nga hootaka ako ka tohaina ki te puutea ko te waahanga tuatahi tera o te Puutea Whakahou a te kaawanatanga aa 75 nga kura e whai waahi ai ki taua waahanga ako.
Hai taa Hekia Parata Minita Maatauranga he whakahirahira nga hootaka nei ki nga kura nei waihoki ka ako hoki nga kura katoa i te pai o nga hua e puta ai.
Te tikanga hoki kia mahi tahi nga kura ki nga haapori ki te rutu i nga raruraru mo te ako kei te kitea whaanuitia i etahi rohe.
Reo Taupo
Whakatairangatia te reo Maori kia tupu kia rea.
Koia te wero kei mua i te whare hoko kai hoko kaawhe, araa cafes o Taupo.
Ka whakaraakaitia aua whare i a ratou ano ki nga tohu hai tautoko i te kaupapa o te reo kia whakanui i te wiki o te reo Maori.
Hai taa Dominic Bowden o te Kaunihera o Taupo e tika ana me awhi te haapori whaanui i te ataahua o te reo rangatira ka tika.
He aha te mea nui ake.
He nui ake te oranga o te tangata i te tuuranga mahi me te moni.
Hai taa kairangahau Tahu Kukutai o te Whare Waananga o Waikato he nui nga korero whakahirahira kua kitea i to ratou paanga ki nga raraunga a te Tari Tatauranga me te kitenga nuie kaha tonu ana te Maori ki te awhi, ki te tautoko, ki te manaaki tangata, ki te rapu hoki i te maatauranga Maori.
Copyright © 2015, UMA Broadcasting Ltd: www.waateanews.com
RELATED NEWS
