Listen Now: 
Davis, ka whakahaere hiikoi.
Me pehea te iwi e whakaatu i te whakahee ki tetahi kaupapa i runga i te rangimaarie ma te hiikoi.
Hai aapopo he hiikoi ka tiimata i te uru o Taamaki ki te whakahee i nga tuukino raawekeweke tangata araa sexual violence.
Ki nga korero o te waa ko Kelvin Davis o te roopu Reipa te kaiaarahi o te hiikoi aa ka hiikoi i tona taha ko nga mema paaremata 30 o nga roopu toorangapuu huri noa.
Tekau maa whitu nga raa te roa o te hiikoi hai whakamahara i a tatou ki nga taimahatanga o taua momo tuukinotanga i o tatou haapori.
Hui whenua, whakahou tikanga.
Kua karangahia te tikanga ki te whakahaere hui hai wherawhera i nga whakaritenga hou e paa ana ki nga whenua Maori.
Hai taa Te Ururoa Flavell Minita Whanake Maori ko te hiahia he whakahou i te ture kia maamaa ake te whakatupu whenua mo nga kaipupuri whenua Maori.
Te tumanako kia whakahoki korero nga kaipupuri whenua Maori mo te Pire Ture Whenua Maori otiraa mo tana tika, mo tana piripono ki nga wawata Maori.
Hai taa Flavell ano he mea nui kia maarama te Maori ki nga pewheatanga o tenei whakahoutanga ki te ture mo te whenua.
Ka tiimata nga hui ki nga iwi a tera wiki.
Wall, he aha te kaawana kaupapa?
He wehi no etahi kaitoorangapuu kei paakinotia te Maori e te tikanga kia whakakore i te puutea timatanga kotahi mano taara i te kuhuna atu ki a Kiwisaver.
Hai taa Bill English Minita Whakahaere Puutea o te kaawanatanga kaare he take o taua puutea whakarata a muri atu nei taa te mea neke atu i te rua miriona nga mema i tenei waa.
Heoi ano e mea ana a Louisa Wall o Reipa pehea kee te 40 paiheeneti o Aotearoa kaahore ano kia whai waahi ki taua hootaka penapena puutea?
Taana whakapae ka huna puutea te kaawana hai hoatutanga ki te hunga whai rawa ma te tapahinga taake a nga tau e tuu mai nei.
Maatauranga, whaangaihia nga rangatahi.
E whakapau kaha ana te Tari Maatauranga ki te taautu i nga taiohi e whai hua ai pena hoki ano ratou ki te ao maatauranga ki te whakapiki mohiotanga.
Koia te kiko o taa ratou hootaka "Count Me In" te iingoa hai taa Minita Maatauranga Heekia Parata he tauira te rewanga ake o te akoranga nei kei te whakapaa atu te tahua puutea a te kaawanatanga ki nga taangata, nui te hiahiatanga.
Kaati kia rua mano pea nga rangatahi ka taautuhia ki nga haapori.
Otautahi, he tikanga whakaruruhau whenua.
E hiahia ana a Ngai Tahu me te Kaunihera o Otautahi ki te whakarite i tetahi whenua taarukenga hai whenua motuhake o te motu.
Ko Takapuuneke te iingoa o te waahi e tirohia ana paatata atu ki Akaroa na Te Rauparaha i huaki i tera atu rau tau.
Hai taa Mark Solomon tiamana o Ngai Tahu he waahi puri mahara a Takapuuneke i awe i nga kaupapa a Piritana i muri mai i a Te Rauparaha tae noa ki te Tiriti o Waitangi.
Ko te papawhenua o te Tiriti o Waitangi anake te waahi e takoto ana hai whenua motuhake o te motu.
Ngaru patu huarahi.
Ngaru nui, ngaru roa, ngaru pukepuke ki te raawhiti o nga motu e rua.
Ki nga korero o te waa kei te patua etahi huarahi ki te aakau o Poneke me Kaikoura e nga ngaru nui no konaa kua katia aua rori ki nga motukaa.
Na te tukuna mai o te tai pari e mea ana te Manatuu Waka ka whakaroa i nga haerenga huarahi.
E mea ana nga kaiwhakahaere huarahi ko Taawhirimaatea raaua ko Tangaroa e mahi tahi ana ki te whakatiki i te ahei o te tangata ki te taraiwa waka.
Copyright © 2015, UMA Broadcasting Ltd: www.waateanews.com
RELATED NEWS
