May 21, 2015
He honore whakatiketike.
He honore whakatiketike.
Kua whakahoonoretia a kaumaatua Kuukupa Tirikaatene o Ngai Tahu mo aana mahi i te ao maatauranga, i te ao Maori hoki.
Kua whakawhiwhia ki te tohu NZ Order of Merit ko ia hoki te kaumaatua o te Kuratini o Manukau i te tonga o Taamaki.
Kua roa ia e haapai ake ana i nga kaupapa o te reo Maori me ona tikanga hai taana kei te tukua atu ana mihi ki te hunga na ratou ia i tautoko i roto i nga tau.
Ka whakanui Tainui i te kaupapa nui.
Hai apopo ka maumahara a Tainui waka i te huritau 20 tau no te whakataunga o taa ratou kaupapa Tiriti o Waitangi.
Ka hui te iwi whaanui ki runga o Tuurangawaewae ka tuu hoki ko tetahi whakaaturanga e paa ana ki nga take o te raupatu.
Hai taa Koro Weetere Minita Take Maori o mua ka hoki ona mahara ki te waa i whakatau ai te iwi i nga kaupapa ki mua i te Karauna.
Ki a ia ano ko te whakakotahitanga o nga hapuu katoa o Tainui koia tonu te hiahia, te whaainga, te wawata.
CYFs he arotake pehea?
Kua uru atu etahi rangatira a iwi ki te tautohetohe e paa ana ki te arotakenga o te tari CYFs.
Ko Raaniera Tau o Ngapuhi tetahi e kii ana he ngoikore te ahei o te poari arotake ki te whakatinana i nga ahuatanga Maori hai haapai ake i te paanga ki nga mahi tirotiro.
Ki a ia kua tae ki te waa kia wharite ai te Maori i nga rongoaa e paa ana ki a tatou kaua ranei e waiho ma iwi kee.
Ki etahi atu e whakamahi ana te arotake nei i te reo o te ao pakihi ka mahue ki muri ko nga tauira paapori.
He kaukauranga waiariki.
E tika ana kia riro ano ma Rotorua te mana waiariki o te Moana Nui a Kiwa.
Koia te tumanako o Steve Chadwick koromatua o Rotorua whai muri i te tohanga o tetahi puutea nui a te kaawanatanga ki te hanga i tetahi waahi waiariki motuhake i raro i te mana whakahaere o Ngati Whakaue.
Heoi ano kei te amuamu te roopu Paakeha o nga Kaiutu Taake hai taa ratou kei te mirimiri te kaawana i te tuaraa o te Maori.
He paanga toi.
Kua hoki mai nga kaitoi Maori a Colleen Urlich raaua ko Baye Riddell ki te kainga ki Aotearoa whai muri i te whakawhitinga puukenga ki te iwi taketake Chinook i Amerika.
He kaha hoki no taua iwi Chinook ki nga puukenga e paa ana ki te waka.
Kaati ka whakaaturia nga mahi o te waa a te tokorua nei ki Washington ko Uku Aotearoa te iingoa o te whakaaturanga.
Nga kanohi o te ao hou.
Kei te kite i te huringa o te kanohi o Aotearoa.
E mea ana te Tari Tatauranga o Aotearoa ka tupu matomato ko te rahi o nga taangata e taautuhia ana ki te iwi Maori, ki tetahi iwi o Aahia, ki tetahi o Te Moana Nui a Kiwa a nga tau e tuu mai nei.
Ka tupu tere ake nga iwi o Aahia kei konei e noho ana. Kaati hai te tau 2038 e matapae ana kia 20 paiheeneti o Aotearoa he Maori.
Copyright © 2015, UMA Broadcasting Ltd: www.waateanews.com