Listen Now: 
He ahua kaahore e paingia ana?
Mehemea he Maori te ahua o te tangata he iti ake te ahei ki te noho i tou ake whare.
Koia tetahi kitenga o nga kairangahau i te Whare Waananga o Taamaki Makaurau araa i te whakatewhatewha ki nga waiaro me nga uuara o Aotearoa.
Hai taa Taakuta Carla Houkamau he mea nui te ahua a waho o te tangata ki nga tatauranga pupuri whare me tana kii ka tohu pea nga kitenga rangahau ki te whakahaawea a iwi i roto i nga puunaha whakahaere o te motu.
Ngaamotu horekau he reo o te Maori.
Kaahore te kaawanatanga e piripono ana ki te kaupapa kia whai reo te Maori ki nga Kaunihera.
Koia te whakapae a Andrew Judd koromatua o Ngaamotu i runga i te pooti a nga kainoho o taua taone na ratou i kaha whakahee i nga tuuru Maori ki to ratou Kaunihera.
Hai taa Judd ano e pouri ana ia ki te whakautu a te Piriimia a John Key ki te whakaneke noa iho i te kaupapa.
Kaati e whakaaro ana a Judd me kore ia e amuamu atu ki te Kaahui o te Ao e paa ana ki te arokore o Aotearoa ki nga motika o iwi taketake.
He arotake whakapiko.
E tatari tonu ana te roopu Waahine Toko i te Ora ki te rongo i te whakautu a te kaawanatanga ki to ratou wero mo te ahua o te hunga tirotiro kei runga i te roopu e arotake ana i te tari tiaki tamariki o CYFs.
Hai taa Prue Kapua peretini o to tatou roopu waahine kei hea te tirohanga Maori motuhake i runga i taua poari arotake.
Hai taa Kapua ano i tuhi atu ia ki te minita ki a Anne Tolley i tera marama engari kaahore ano a Tolley kia whakahoki korero.
He tohu motuhake.
Kua whiriwhirihia ko Chelsea Winstanley o Ngati Ranginui kia whakawhiwhia ki te tohu whakatiketike Mana Wahine mo nga Waahine Maori Kiriata mai, Pouaka Whakaata mai.
Ka tukua taua tohu ki a ia i te Ahurei Kiriata Maori o Wairoa hai te mutunga o tenei marama.
No te tau 2009 kua whai waahi ia ki te whakahaere i nga kiriata, i nga pakipuumeka hoki aa e aarahi ana ia i te ahu whakamua hai hiikoitanga mo nga waahine Maori ki te hanga kiriata
Hinengaro titiro whaanui.
Haramai te ahua o nga Maori koi te hinengaro.
Koia te akiaki a Maarama Fox rangatira takirua o te Paati Maori ki ena o tatou e kaha nei ki te whakatupu kaupapa, ki te whakairo whakaaro ki nga mahinga hou.
Kua riro i te Paati Maori etahi puutea hai tautoko i nga mahi hou a te Maori.
Hai taa Fox ahakoa kei te tupu tonu etahi roopu, etahi pakihi Maori he pai nga otinga o te waa. Kaati hai taa Fox ano ko te huarahi whakatupu koia te ara tika mo tatou.
Tiihei Kahungunu
Ka rongo i te reo o Ngati Kahungunu ia marama ki tetahi tuhinga hou.
Ko Tiihei Kahungunu te iingoa o te tuhinga nei he mahinga ngaatahi a te iwi raa me te taanga whaanui o Hawkes Bay Today.
Hai taa Ngahiwi Tomoana tiamana o Ngati Kahungunu ka nui te hiahia o nga uri ki tetahi tuhinga pera.
Hai taa Tomoana ano he nui nga korero whakakipakipa kei te rongohia i to tatou ao Maori hai kaupapa tuhituhi ma Tiihei Kahungunu.
Copyright © 2015, UMA Broadcasting Ltd: www.waateanews.com
RELATED NEWS
