March 26, 2015
Ka whai hua te Maori?
Ka whai hua te Maori?
Tera tonu pea he iti noa iho nga hua ka taka mai ki te Maori pena toa a Winston Peters i te pooti ohorere mo te rohe auraki o Northland a te Raahoroi.
Koia te whakapae a Haami Piripi upoko whakahaere o Te Raarawa. Kua mahue te tangata o Naahinara a Mark Osborne i a Winitana ko te kai i te puehu o te pahi nui o Aotearoa Tuatahi koia te tirohanga rangahau o te waa.
Ahatia e kii ana a Piripi ko ia tetahi o te waahanga tokomaha i te Taitokerau kaahore e whakapono ana ki a Peters.
Nga huringa tuku mahi.
Ka titiro atu te kaawanatanga ki nga kaituku mahi e whakapeehi ai, e tinihanga ai o ratou kaimahi.
Kua whakarite tikanga hou kia kaha ake nga haamene e whiu atu ki era momo kaiwhakahaere, ki era kamupene ranei.
Mehemea ka kino rawa atu te mahi, ka peia te kaituku mahi, ka haamenetia a puutea.
Kaati kua whakaae te kaawanatanga ki te whakauru i nga tikanga hou ki te Pire Taumata Tuumahi.
Huarahi Tika, e pai ana te haere.
E harikoa ana a Daphne Luke tiamana o te roopu ara tuuaatea Maori e kiia nei ko te Huarahi Tika Trust ki te ahua o te anga whakamua o tana roopu. Na Huarahi Tika te porohanga whitu paiheeneti o te kamupene 2 degrees.
Hai taa Luke kei te tupu taa ratou hootaka Iwi Connect aa ko ratou kei te kookiri kaupapa mo Ngai Tatou ki nga mahinga waea puukoro.
I tenei waa e kimi ana a Huarahi Tika i nga kaiwhakahaere hou, he rangatahi pea, nui te kaha, koi te hinengaro.
Pohio, ka wehe atu.
Ka tuu a Chris Joblin kaiwhakahaere take puutea o Tainui hai toihau o te waa mo Tainui Group Holdings.
Ka piki tuuranga a Joblin mo Mike Poohio e wehe atu ai a tera marama whai muri i nga tau e waru tau hai toihau.
I roto i taua waru tau kua piki maarika te waariu o nga rawa a Tainui aa kei te kimi te poari o Tainui i tetahi tangata hou.
I uru atu a Chris Joblin ki Tainui Group Holdings i te tau 2009.
Kei mua noa atu.
Kua oma kee te hoiho, he toomuri rawa kia whakaora a Piriimia John Key i te tuuru auraki a Naahinara o Northland.
Koia te korero a Winston Peters o Aotearoa Tuatahi me tana kii ko te hiahia o nga kaipooti o Naahihara he aha i whakarite ai taua pooti ohorere i te tuatahi?
Heoi ano kei mua noa atu a Peters e ai ki nga tatauranga rangahau aa e mea ana te nuinga o nga kaiwetewete toorangapuu kei raro rawa e Naahinara me to ratou tangata a Mark Osborne e putu ana i tenei waa.
He aituaa ngahere.
Kua mate ano he kaimahi tope raakau i Whakaahurangi Taranaki whai muri te tukinga o tetahi poro raakau ki a ia.
I te taenga atu o nga ratonga ohotata ki a ia kua mate kee a ia.
Ki nga korero o te waa he kino ona whara kaati koia te kaimahi o te waa ki te mate i roto ngahere i a ia e mahi ana.
Copyright © 2015, UMA Broadcasting Ltd: www.waateanews.com