Listen Now: 
E tau ana te pungarehu.
Kua tiimata ano nga ratonga wakarererangi i Tonga whai muri i te pahuu nui o tetahi puia paatata atu ki te taone matua o Nukualofa i tenei wiki.
Haaunga ano te rerenga ake o te pungarehu ko te kaupapa nui kee i reira ko te whakatuuwheratanga o te kaahui toorangapuu me to ratou Piriimia hou a Akilisi Pohiva.
E kore te Kiingi a Tuupou te tuaono e tae atu ki tera hui nui ahatia ka hau atu te iti me te rahi ki te whakanui i nga kanohi toorangapuu hou.
Kei hea nga whare?
He koopaka o te whare o te tari whare huri noa te motu.
E aawangawanga ana nga kaimahi haapori ki te maha o nga whaanau kei te noho kainga kore i tenei waa.
Ko etahi e kii ana ko te teeneti to ratou whare e mea ana etahi atu ko te motukaa te tuanui hai whakaruruhau i a ratou.
Kaati ko te raruraru nui ki nga whaanau ko te oranga o nga tamariki me te ahei ki te tuutuki i o ratou hiahia.
Te whaaki a Al Qaeda.
Kua whakatuuturu tetahi peka o te roopu Al Qaeda i te whenua o Yemen na ratou te niupepa o Charlie Hebdo i huaki kia ngaki i te ahua o nga whakaaturanga mo to ratou poropiti mo Muhammad.
Kei te pouri katoa a Wiiwii whenua ki te koohurutanga o te tekau maa rua taangata i tera wiki heoi ano kei te mea mai a Al Qaeda he pakanga kei te haere ake aa ko te marino o te rangimaarie e rapua nei e nga iwi whakapono kore o te ao e kore e kitea.
NCEA kua puta nga otinga.
Kei te waipuketia te ipurangi e nga tauira kura tuarua e kimi ana i o ratou otinga NCEA mo te tau 2014.
E mea ana te tari wharite paerewa ako ko te puunaha NCEA ka wero i nga puukenga o nga aakonga ki nga waahanga ako katoa aa ka whakaatu kei hea te tauira e tuu ana i te taumata o te mohiotanga huri noa nga kura te motu.
Akuanei ka tuku atu ki nga kaainga ko nga tohu a tena, a tena o nga aakonga.
Mako wai paapaku.
Na te mahana o te moana i tenei waahanga o te tau e whakatata mai nei ko nga mako ki te takutai kei reira ko te tangata e poohutuhutu ana.
I tera wiki i kitea tetahi mako nui i te moana o Kaipara aa kua kite ano i taua mako ki te raki o Taamaki i tenei wiki.
Atu i nga kitenga nei he maha nga mako parauri kei te kitea huri noa ko etahi e kautaahoe ana tata ki te whatinga o nga ngaru.
He haamene huakore.
Me mutu te tukuna o nga tiikiti ki nga kaihautuu waka o te motu mo te kore noa iho.
Koia te karanga a Ron Mark o Aotearoa tuatahi e paa ana ki nga tikanga kikii ake a nga piriihimana ki runga i nga huarahi.
Hai taa Mark ko te otinga o taua tikanga he whakamataku i te tangata i etahi waa ka puta te maurirere.
Kaati ki etahi atu na te whiunga mai o nga haamene a puutea me te whakahekenga o te tere haere ki nga rori kei moorearea ake o tatou huarahi.
Copyright © 2015, UMA Broadcasting Ltd: www.waateanews.com
RELATED NEWS
