Listen Now: 
Irirangi kore puutea.
E whakarite ana te roopu tohatoha puutea take paapaaho a te Karauna kia tuu ai nga reo irirangi Maori kaahore e tautokohia ana a puutea ki te wero i a ratou.
Rua tekau maa tahi nga reo irirangi kei te utua i tenei waa e whaa ano nga roopu whakapaaho kei te rapu tautoko.
Hai taa Te Maangai Paaho kei te whakahaere rangahau ratou ki te ahua o nga huarahi hai whakawhaanui i te kaahui o nga reo irirangi Maori.
Kua aronuitia nga mahi.
Kua whakahonoretia Te Runanga o Tuupoho me te Kaunihera o Whanganui ki te tohu a haapori mo nga mahinga hou na to ratou kaupapa whakahou parapara.
Hai taa kaiwhakahaere Raamari Te Uamairangi kua whai waahi te iwi ki te uru atu ki tetahi pakihi whai hua hai tautoko i tona iwi me te hiahia hoki ki te tiaki i a Papatuuaanuku.
Taapiri atu ki te whakahoutanga o te parapara kei te whakarato i tetahi waahi ako mo te haapori.
Whakarongo ake ki nga korero a te katoa.
Me aro ki te waariu o nga korero a te Maori e paa ana ki te Tiriti o Waitangi me ona ahuatanga.
Koia te tohutohu a Moana Jackson roia Maori ki etahi kairangahau Paakeha ka tere whakahee i te tirohanga Maori.
Hai taana ano ko etahi o ratou kei te aro ki te tirohanga Paakeha anake mo te hiitori o Aotearoa.
E mea ana a Moana Jackson ko taa etahi kairangahau he whakatiitaha, he whakapiko i nga korero tuku iho a te Maori ma reira ka whakarangatira i te turanga a te Paakeha.
Te pai o te tukanga.
He whakahirahira te tukanga Tiriti o Waitangi na te korenga o te Karauna ki te whakahoonora i a ratou here i raro i te Tiriti.
Koia te korero a Piriimia John Key i tana korero mo te puurongo a te Taraipiunara mo nga kereeme a Ngapuhi.
Hai taa Key ano e kore taua puurongo e whakapooturi i te ahu whakamua o te whakataunga Tiriti o Waitangi a Ngapuhi no te mea ka nui te hiahia o te Taitokerau ki te puutea hai whakatupu i to ratou taha oohanga.
Rotorua whakarite hononga.
He mea nui ki te Kaunihera o Rotorua te hononga ki nga iwi o te rohe.
Koia tetahi waahanga o te mahere hou a te kaunihera me te kii a koromatua Steve Chadwick kua tata oti taua mahere whai muri nga tau e toru e totoru atu ai ki te haapori whaanui.
Heoi ano te tikanga kia whakapai ake i nga wai moana, i nga huarahi oohanga, i nga wawata a ahurea etahi o nga whaainga hai tirohanga atu ma te katoa.
Tauranga tuuru kore.
Kaore ano a Tauranga kia rite mai mo tetahi tuuru Maori motuhake ki runga kaunihera.
Koia te korero a Stuart Crosby koromatua o Tauranga whai muri te whakahee i taua wawata.
Hai taa te Kaahui Maori o Tauranga Moana e titiro whaaiti ana a Crosby ki te kaupapa aa e whakaatu ana te whakaheenga o tetahi tuuru Maori i te mataku me te kore mohio o nga kaikaunihera ki te tuuranga o te Maori.
Hai taa taua kaahui ano e kore e taea te whakaririka i nga hiahia o te Maori mo ake tonu atu.
Copyright © 2014, UMA Broadcasting Ltd: www.waateanews.com
RELATED NEWS
