November 12, 2014
Tango taonga.
Tango taonga.
Mehemea ka tango atu i nga taonga a nga mauhere tera tonu pea he kino nga paanga.
A tera wiki ka aukati te Tari Whakatika Tangata i nga taonga pounamu me nga manaia ma nga mauhere hou.
Heoi ano e kii ana a Ahorangi Pou Temara o te Whare Waananga o Waikato ko etahi o nga taonga a nga mauhere he taonga tuku iho aa ko te mauri o te hunga na ratou te taonga i mua ka whakawhiti ai ki te tangata e mau ana taua taonga i muri mai koia te hiranga o te taonga.
Hua hao ika.
Kua whakaheke a Ngati Kahungunu i te waariu o a ratou hua ki roto i te kamupene hao ika o Aotearoa.
Koia te mahi a te iwi whai muri nga whakapae a etahi mo te kaha o te paanga o Aotearoa Fisheries ki a Sealord.
Hai taa Ngahiwi Tomoana tiamana o Kahungunu me whakahou a hao ika Aotearoa i to ratou ahua kia kooataata te titiro otiraa kia maarama ake te kitenga o nga mahi ma nga iwi kei te pupuri hua ki taua kamupene.
Waka moana.
I tenei ata kei te kite a Poihaakena i te huinga o nga waka o te Moana Nui a Kiwi.
Kei reira aua waka mo te hui nui e paa ana ki te manaakitanga o te taiao.
Ko te waka Maori e mohiotia nei ko Haunui tetahi me te kii a tana kaihautuu a Hotu Kerr akuanei ka whakawhiti mai a Haunui me etahi atu waka i te moana taapokopoko a Taawhaki ki Taamaki Makaurau mo te taenga mai o te waka o Hokulea o Hawaii a te tuawhitu o Tiihema.
Otautahi, he matapae.
Kua heke te mooreareatanga kei patua anotia a Otautahi e tetahi ruu nui o te whenua a te tau e tuu mai nei koia te titiro a nga kaipuutaiao Paakeha.
Kua huri o ratou whakaaro whai muri te tirohanga atu ki tetahi waahi iti ake te ahua i a ratou rangahau.
Te mutunga ake kua heke ki te 59 paiheeneti tera pea ka tau atu he ruu 5 ki te 6 te kaha a te tau e haramai ana 7 paiheeneti o tetahi ruu 6 ki te 7 te kaha.
Paipa waananga.
Ka tuu tetahi waananga kore utu a te 15 o tenei marama ki te tautoko i te hunga e hiahia ana kia mutu te kaipaipa.
Ko Te Iti o Hauaa te marae e hautuu ai te hui raa me te kii a te roopu whakahaere o Whakawaatea te Haa ka tuku i nga rawa tautoko me nga moohiohio aawhina ki nga taangata momi tuupeka.
Hai taa ratou ano he rangi tera mo te whaanau katoa.
Copyright © 2014, UMA Broadcasting Ltd: www.waateanews.com