Listen Now: 
Hao ika he hononga.
Kei te whai waahi etahi iwi ki nga mahinga hao ika i raro i tetahi hootaka hou.
Ko te Ihu to Mai te iingoa o te hononga hou i waenga i te kamupene o Sealord me nga iwi o te kaahui e kiia nei ko Te Kupenga.
Ko te tikanga kia whakahaere a Sealord i te tohanga hao ika a nga iwi a Waikato, Maniapoto, Raukawa, Hauraki, Te Whaanau a Apanui, Te Aupouri.
E mea ana a Te Kupenga he nui nga hua ka taka mai ki nga iwi i runga i to ratou hononga hou tae atu ki nga tuuranga mahi mo etahi.
Turanga mahi ka whakangaro atu.
98 nga tuuranga i te Tari Whakatupu i nga Kaupapa Paapori o te MSD ka tapahia na runga i te hiahia o taua tari ki te whakahou i to ratou ahua.
Ka whakakotahi i te tari paapori nei ki te Tari Hiranga Tangata o WINZ me te Tari Kaumaatua.
Kei te kii te roopu Puukenga Here Tikanga Mahi o te PSA ma ratou te hunga paakino e tautoko.
Pukamata he kupenga whaanui.
He aha nga paanga o te tikanga rorohiko e kiia nei ko pukamata ki a tatou tikanga Maori?
E mea ana a kairangahau Pikihuia Reihana koia tetahi paatai i te whakaritenga o tana waahi ipurangi e kiia nei ko Ngati Pukamata mo te hononga o nga Maori huri noa te ao ki a tatou ano.
Hai taana ano ahakoa he aha te whakautu korero ma nga haangarau hou ka whakawhaanui i te tirohanga ki te ao me o tatou piringa ki era o nga ahuatanga Maori kua uuhia ki te ipurangi e whakararata nei i te rangatahi, i te pakeke hoki.
Te aronga o te reo.
Ka anga pehea te reo Maori a nga tau e tuu mai nei?
Kua huri te Komiti Whiriwhiri Maori o Paaremata ki te whakarongo ki nga tono a waha mo tera kaupapa nui.
Hai taa Tuutehounuku Korako te timana hou o taua komiti he mea nui te paanga o te iwi whaanui ki nga korero mo te ahu ki mua o te reo aa ka waatea ano tatou ki te korero mo te pire hou ka tohungia ki te whakatuunga o te anga a iwi e kiia nei ko te Maataawai ko taa te Maataawai he whakahaere i etahi kaupapa whakarauora reo Maori.
Rapu rongoaa.
Kua hui te haapori o Raahui Pookeka ki te matapaki i nga raruraru i to ratou taone.
Tokomaha nga taangata kua hora i o ratou aawangawanga mo te rahinga o nga mahi kikino, o te taahae, o te patu tangata.
Kua korerohia mo etahi rongoaa pera i tetahi whare whakakori tinana mo nga rangatahi me etahi atu whakaritenga.
Hai taa Hori Awa o Te Waahi Whaanau Trust ko te mea nui kia whakapakepake i te iwi ki te tautoko i nga kaupapa whai hua rangatahi mai, pakeke mai.
Nga take whare
He maha nga whare o te tari whare horekau he tangata kei roto.
Hai taa Louisa Wall mema paaremata o Reipa i Manurewa koia tana kitenga.
Ki a ia kei te hee tera ahua i runga i te mohio ki te tini manomano e oke ana araa kei roto motukaa, kei roto waahi taretare e moe ana kei pouaka maati me kii e noho ana.
Hai taa Wall ano ka arotahi ia ki nga kaupapa whare a nga raa e tuu mai nei.
Copyright © 2014, UMA Broadcasting Ltd: www.waateanews.com
RELATED NEWS
